تاثیر 22 ستمبر ۲۰۲۵:- ایس -ایم- حسن
ایٹا نگر، 22 ستمبر:وزیر اعظم نریندر مودی نے پیر کو کہا کہ کانگریس کے ذریعہ نظر انداز کرنے کی وجہ سے اروناچل پردیش اور پورا شمال مشرق کئی دہائیوں سے ترقی سے محروم ہے۔ کانگریس پارٹی نے اس علاقے کو صرف ووٹوں اور سیٹوں کی تعداد کے لحاظ سے دیکھا اور اسے نظر انداز کیا۔ انہوں نے کہا کہ بی جے پی نے 2014 کے بعد اس ذہنیت کو بدلا اور شمال مشرق کو اپنی ترقی کی ترجیحات کے مرکز میں رکھا۔ وزیر اعظم مودی 5,025 کروڑ روپے کے ترقیاتی منصوبوں کا سنگ بنیاد رکھنے اور افتتاح کرنے کے بعد اجتماع سے خطاب کر رہے تھے۔
مودی نے کہا، “ہمارے اروناچل پردیش میں سورج کی کرنیں سب سے پہلے آتی ہیں لیکن ترقی کی کرن یہاں پہنچنے میں کئی دہائیاں لگ گئیں۔ کانگریس کے دور حکومت میں دہلی کے لوگوں نے سوچا کہ چونکہ یہاں صرف دو لوک سبھا سیٹیں ہیں، اس لیے توجہ کیوں دی جائے۔ کانگریس کی یہی سوچ تھی جس نے شمال مشرق کو بہت پیچھے دھکیل دیا ۔ انہوں نے کہا کہ بی جے پی کا منتر ووٹوں یا سیٹوں کی تعداد نہیں ہے بلکہ ’’نیشن فرسٹ‘‘ ہے۔