تاثیر 11 ستمبر ۲۰۲۵:- ایس -ایم- حسن
وارانسی، 11 ستمبر: وارانسی (کاشی)، اتر پردیش کا ثقافتی اور روحانی مرکزنے جمعرات کو ایک تاریخی سفارتی موقع کا مشاہدہ کیا جب ہندوستان اور ماریشس کے وزرائے اعظم کے درمیان دو طرفہ بات چیت ہوئی۔ پہلی بار وزیر اعظم مودی نے کاشی میں کسی سربراہ مملکت کے ساتھ باضابطہ دو طرفہ بات چیت کی۔
کاشی کے ندیسر میں ہوٹل تاج میں سخت سیکورٹی کے درمیان منعقدہ ایک اعلیٰ سطحی میٹنگ میں وزیر اعظم نریندر مودی اور ماریشس کے وزیر اعظم ڈاکٹر نوین چندر رامگولام نے مثبت اور خوشگوار ماحول میں کئی اہم امور پر تبادلہ خیال کیا۔ یہ ملاقات اس لحاظ سے تاریخی تھی کہ وزیر اعظم نریندر مودی نے اپنے پارلیمانی حلقہ وارانسی میں سربراہ مملکت کے ساتھ باضابطہ میٹنگ کی۔ اس سے پہلے وزیر اعظم نریندر مودی نے فرانس کے صدر ایمانوئل میکرون اور اس وقت کے جاپان کے وزیر اعظم اب آنجہانی شنزو آبے کی میزبانی کی تھی لیکن ان کے ساتھ رسمی بات چیت نہیں ہوئی تھی۔ یہ پہلا موقع ہے کہ کاشی میں کسی سربراہ مملکت کے ساتھ باضابطہ دو طرفہ بات چیت ہوئی۔