تاثیر 18 ستمبر ۲۰۲۵:- ایس -ایم- حسن
بارہمولہ، 18 ستمبر: شمالی کشمیر کے بارہمولہ ضلع میں جمعرات کواس وقت احتجاج شروع ہوگیا جب سینٹ جوزف نرسنگ انسٹی ٹیوٹ کے طلباء نے انڈین نرسنگ کونسل (آئی این سی) کے انسٹی ٹیوٹ کے نرسنگ پروگراموں کو قومی شناخت واپس لینے کے فیصلے کے خلاف مظاہرہ کیا۔ اس اقدام نے ان سینکڑوں طلباء میں خطرے کی گھنٹی بجا دی ہے جن کی ڈگریوں کو اب جموں و کشمیر سے باہر غلط قرار دینے کا خطرہ ہے۔پلے کارڈ اٹھائے اور نعرے بلند کرتے ہوئے مشتعل طلباء نے مصروف بارہمولہ سری نگر شاہراہ پر تقریباً آدھے گھنٹے تک ٹریفک کو روک دیا۔ انہوں نے جموں و کشمیر انتظامیہ کے ساتھ ساتھ مرکزی وزارت صحت سے اپیل کی کہ وہ فوری طور پر مداخلت کریں اور شناخت بحال کریں، انتباہ دیتے ہوئے کہ ان کا تعلیمی مستقبل خطرے میں ہے۔ آئی این سی نے ایک حالیہ حکم میں کہا ہے کہ انڈین نرسنگ کونسل ایکٹ 1947 کے سیکشن 14 کے تحت کئے گئے معائنہ کے دوران پائی جانے والی سنگین خامیوں کی وجہ سے سینٹ جوزف کورسز کے لیے اس کی پہچان واپس لی جا رہی ہے۔ گریجویٹوں کو قومی سطح کے بھرتی امتحانات میں شرکت کرنے کی اجازت نہیں ہوگی۔ اس فیصلے سے بظاہر پریشان طلباء نے حکام اور میڈیا کے سامنے اپنی ناراضگی کا اظہار کیا۔ ”آئی این سی نے ہمارے کالج کی شناخت واپس لے لی ہے۔ اب، ہم جموں و کشمیر سے باہر نوکریوں کے لیے درخواست نہیں دے سکتے اور نہ ہی قومی سطح کے امتحانات میں بیٹھ سکتے ہیں۔ ان باتوں کا اظہار ایک احتجاج کرنے والے طالب علم نے کیا ہے۔ ایک اور نے مزید کہا کہ ہم نے یہاں بوپی کے ذریعے داخلہ لیا، اور آج ہی ہمیں معلوم ہوا کہ ہمارا کالج آئی این سی سے تسلیم شدہ نہیں ہے۔ ہم انتظامیہ سے اپیل کرتے ہیں کہ ہمارے مطالبات کو پورا کیا جائے تاکہ ہمارا مستقبل تباہ نہ ہو۔ طلباء نے کالج انتظامیہ پر اس سارے عمل کے دوران خاموش رہنے کا الزام لگاتے ہوئے کہا کہ انہیں آئی این سی کی طرف سے نمایاں کی گئی خامیوں کے بارے میں مطلع نہیں کیا گیا تھا۔