تاثیر 29 ستمبر ۲۰۲۵:- ایس -ایم- حسن
گرینڈ بلینک (مشی گن)، 29 ستمبر:امریکی صدر ڈونلڈ ٹرمپ نے مشی گن کے گرینڈ بلینک ٹاؤن شپ کے چرچ میں فائرنگ کے واقعے کی شدید مذمت کرتے ہوئے اسے عیسائیوں کے خلاف حملہ قرار دیا ہے۔صدر ٹرمپ نے وائٹ ہاؤس سے ایک بیان میں کہا، “یہ تشدد کی وبا ہے جو امریکہ کو تباہ کر رہی ہے۔ اسے فوری طور پر روکنا چاہیے۔ ” انہوں نے متاثرین کے اہل خانہ سے تعزیت کا اظہار کیا اور قانون نافذ کرنے والے اداروں کے ردعمل کی تعریف کی۔
اتوار کو مشتبہ حملہ آور 40 سالہ تھامس جیکب سینڈ فورڈ نے اپنا ٹرک چرچ آف جیسس کرائسٹ آف لیٹر ڈے سینٹس میں گھسایا اور اندھا دھند فائرنگ شروع کر دی۔ اس کے بعد اس نے عمارت کو آگ لگا دی۔ اس حملے میں کم از کم پانچ افراد مارے گئے، جب کہ آٹھ افراد شدید زخمی ہوئے۔ پولیس کی جوابی کارروائی میں وہ بھی مارا گیا۔