تاثیر 5 ستمبر ۲۰۲۵:- ایس -ایم- حسن
واشنگٹن، 05ستمبر:امریکی صدر ڈونلڈ ٹرمپ نے جمعرات کو کہا کہ وہ روس کے صدر ولادیمیر پوتن سے جلد ہی بات کریں گے۔ انہوں نے یہ بات اپنے یوکرینی ہم منصب ولادیمیر زیلنسکی اور یورپی رہنماؤں کے ساتھ کال پر بات کرنے کے بعد کہی۔ٹرمپ سے جب ایک رپورٹر نے پوچھا کہ مستقبل قریب میں وائٹ ہاؤس میں امریکہ کے ممتاز ٹیک ایگزیکٹوز کے ساتھ عشائیہ کے موقع پر کیا وہ روسی رہنما سے بات کریں گے تو انہوں نے کہا، ’جی ہاں، میں کروں گا۔‘
کال پر یورپی رہنماؤں سے یہ گفتگو پیرس میں ہونے والی سربراہی کانفرنس کے بعد ہوئی جس کا مقصد تھا کہ اگر یا جب بھی جنگ بندی ہو تو یوکرین کے لیے حفاظتی ضمانتوں کی منصوبہ بندی کی جائے۔کریملن کے ترجمان دمتری پیسکوف نے جمعہ کو کہا کہ ٹرمپ کے ساتھ گفتگو کی’اگر ضرورت ہو تو اس کا بہت جلد بندوبست کیا جا سکتا ہے‘ لیکن انہوں نے کیئف کے لیے مغربی سلامتی کی ضمانتوں کا خیال مسترد کر دیا۔پیسکوف نے سرکاری خبر رساں ایجنسی آر آئی اے نووستی کو بتایا، ’کیا غیر ملکی خاص طور پر یورپی اور امریکی فوجی دستے یوکرین کے لیے سکیورٹی فراہم کر سکتے ہیں اور اس کی ضمانت دے سکتے ہیں؟ یقیناً نہیں، وہ نہیں کر سکتے۔ یہ یوکرین کے لیے سلامتی کی ایسی ضمانت نہیں ہو سکتی جو ہمارے ملک کے مطابق ہو۔جمعرات کو پیرس سربراہی اجلاس کے اختتام پر رہنماؤں کے اعلان کردہ کسی بھی حتمی امن معاہدے کے بعد یوکرین میں تعیناتی کے لیے دو درجن سے زائد ممالک نے ’یقین دہانی‘ کروانے والی ایک فوج میں شمولیت کا وعدہ کیا ہے۔ اس معاہدے کا مقصد ماسکو کو یوکرین پر دوبارہ حملہ کرنے سے روکنا ہے۔