تاثیر 7 اکتوبر ۲۰۲۵:- ایس -ایم- حسن
چنڈی گڑھ، 7 اکتوبر : پنجاب حکومت نے ریاست میں ’’کولڈریف‘‘ کھانسی کے سیرپ کی فروخت اور استعمال پر پابندی عائد کر دی ہے۔ حکومت نے یہ فیصلہ مدھیہ پردیش میں کف سیرپ پینے سے 17 بچوں کی موت کے بعد لیا ہے۔ محکمہ صحت کے ڈائریکٹوریٹ نے پیر کی شام ایک حکم نامہ جاری کیا، جسے منگل کو ریاست کے تمام ضلع عہدیداروں کو بھیج دیا گیا۔
حکومتی احکامات میں کہا گیا ہے کہ پنجاب میں تمام خوردہ فروخت کنندگان، ڈسٹری بیوٹرز، رجسٹرڈ میڈیکل پریکٹیشنرز، اسپتال اور صحت کی دیکھ بھال کے ادارے اس پروڈکٹ کی خرید، فروخت یا استعمال نہیں کریں گے۔ تمل ناڈو میں تیار کیے جانے والے اس سیرپ پر ڈائیتھیلین گلائکول کی ملاوٹ کی وجہ سے پابندی عائد کر دی گئی ہے۔ احکامات میں کہا گیا ہے کہ مدھیہ پردیش فوڈ اینڈ ڈرگ ایڈمنسٹریشن کی ڈرگ ٹیسٹنگ لیبارٹری نے 4 اکتوبر کو ایک رپورٹ جاری کی۔ اس رپورٹ کے مطابق کولڈریف سیرپ نامی دوا ناقص معیار کی پائی گئی۔