تاثیر 4 اکتوبر ۲۰۲۵:- ایس -ایم- حسن
نئی دہلی، 4 اکتوبر:وزیر اعظم نریندر مودی نے ہفتہ کو 62,000 کروڑ سے زیادہ کی مختلف نوجوانوں پر مبنی اسکیموں کا آغاز کرتے ہوئے کہا کہ این ڈی اے حکومت اس بات کو یقینی بنانے کے لئے پرعزم ہے کہ بہار کے نوجوانوں کو اب ان کی اپنی ریاست میں باعزت روزگار ملے گا اورنقل مکانی کا دور ختم ہو جائے گا۔ انہوں نے کہا کہ کبھی تعلیم اور روزگار کی کمی کی وجہ سے لاکھوں نوجوان بہار چھوڑ کر دوسری ریاستوں میں جانے پر مجبور تھے، لیکن آج ریاست ترقی کے نئے دور میں داخل ہو چکی ہے۔
وزیر اعظم نے یہ باتیں یہاں وگیان بھون میں منعقدہ قومی ہنر کنووکیشن سے خطاب کرتے ہوئے کہیں۔ اس موقع پر انہوں نے ملک بھر کے انڈسٹریل ٹریننگ انسٹی ٹیوٹ (آئی ٹی آئی) کے 46 ٹاپ طلباء کو اعزاز سے نوازا۔ مودی نے کہا کہ یہ تقریب ہندوستان میں ہنر مندی کی ترقی کی بحالی کی علامت ہے۔
اس موقع پر وزیر اعظم مودی نے پردھان منتری کوشل اور روزگار پریورتن (پی ایم-ایس ای ٹی یو) اسکیم کا آغاز کیا، جس کے تحت ملک بھر میں 1,000 آئی ٹی آئیز کو 60,000 کروڑ روپے کی سرمایہ کاری کے ساتھ ایک ہب اور اسپوک ماڈل میں اپ گریڈ کیا جائے گا۔ اس ماڈل میں 200 ہب آئی ٹی آئی اور 800 اسپوک آئی ٹی آئی شامل ہوں گے، جو جدید انفراسٹرکچر، ڈیجیٹل لرننگ سسٹم اور انکیوبیشن کی سہولیات فراہم کریں گے۔ مودی نے کہا، پی ایم -ایس ای ٹی یو ہندوستان کے نوجوانوں کو عالمی مہارت کی طلب سے جوڑے گا۔