بھاکپا- مالے کے جنرل سیکرٹری کامریڈ دیپانکر بھٹاچاریہ کا کیا دورہ

بھاگلپور۔ (منہاج عالم)بھاکپا-مالے کے جنرل سیکرٹری کامریڈ دیپانکر بھٹاچاریہ کی قیادت میں پارٹی کی ایک اعلیٰ سطحی ٹیم نے گاندھی جینتی کے دن، 2 اکتوبر کو پیپینتی کا دورہ کیا۔ اس سے پہلے، انہوں نے تلکا مانجھی بھاگلپور یونیورسٹی کے گاندھی وچار ڈپارٹمنٹ میں گاندھی جی کے مجسمے پر پھولوں کی مالا چڑھا کر انہیں خراج عقیدت پیش کیا۔ یہ دورہ یہاں ایک مجوزہ پاور پروجیکٹ کے خلاف کیا گیا، جس میں اڈانی گروپ کو محض 1 روپے کی شرح پر 1050 ایکڑ زرخیز زمین سونپ دی گئی ہے۔پیرپینتی کے زمین حاصل کرنے والے علاقے میں، کامریڈ دیپانکر بھٹاچاریہ نے کسانوں اور متاثرہ خاندانوں سے ملاقات کی اور ان کے دکھوں میں شریک ہوئے۔ انہوں نے کہا کہ پیپینتی کی زرخیز زمین اڈانی کو سونپنا ترقی نہیں، بلکہ تباہی کا سودا ہے۔ یہ سودا کسانوں کی کھیتی، باغات اور پورے علاقے کی زندگی پر سیدھا حملہ ہے۔ متاثرہ کسانوں کا کہنا ہے کہ آم کے باغات کا کاروبار ہزاروں لوگوں کو روزگار فراہم کرتا ہے۔ اڈانی کا پاور پروجیکٹ نیا روزگار نہیں دے گا، بلکہ موجودہ روزگار چھین لے گا اور پورے علاقے کی ہوا، پانی اور زمین کو زہریلا بنا دے گا۔ انہوں نے کہا کہ کسانوں پر زمین خالی کرنے کا دباؤ ڈالا جا رہا ہے۔ انہیں بار بار نوٹس تھمائے جا رہے ہیں اور مخالفت کرنے پر بی جے پی رہنماؤں کی طرف سے جیل میں ٹھونسنے کی دھمکی دی جا رہی ہے۔انہوں نے کہا کہ اس سودے کے سبب بڑے پیمانے پر ماحول اور کسانوں کی زندگی پر حملہ ہونے جا رہا ہے۔ اس پروجیکٹ کے لیے تقریباً 10 لاکھ درخت کاٹے جائیں گے اور بڑی تعداد میں دیہی خاندانوں کو زبردستی بے گھر کیا جائے گا۔ یہ سودا بہار کی عوام اور زرعی معیشت کے ساتھ صریح دھوکہ ہے۔ اڈانی کو دی گئی زمین کھلا گھوٹالہ ہے۔ ہم این ٹی پی سی کے پاور پلانٹ اور اڈانی کے پاور پروجیکٹ کے طریقہ کار اور شرائط کے درمیان کا فرق اور معاوضہ، بحالی، جبر اور اس تباہ کن پروجیکٹ کی حقیقت عوام کے سامنے لائیں گے۔ اس پورے معاملے کو ریاستی سطح پر بڑا سیاسی مسئلہ بنائیں گے۔ 2 اکتوبر، گاندھی جینتی کے دن، پیپینتی کا یہ دورہ عوام کے حق، زمین کی حفاظت اور ماحولیاتی تحفظ کی جدوجہد کو نیا عزم دے گا۔

اس موقع پر مالے کے گھوسی سے ایم ایل اے رام بالی سنگھ یادو، سابق ایم ایل اے منوج منزل، ریاستی کمیٹی کے رکن اور اے آئی سی سی ٹی یو کے قومی نائب صدر ایس کے شرما اور ضلع سیکرٹری مہیش یادو، ضلع کمیٹی کے رکن رندھیر یادو اور گوری شنکر رائے، آر جے ڈی کے دلت سیل کے ضلعی صدر سنجے رجک، سماجی انصاف تحریک کے رنکو یادو اور ریاستی صدر رامانند پاسوان، ریاستی سیکرٹری ارجن شرما اور دیگر مقامی رہنما – کارکنان بھی شامل رہے۔