دربھنگہ جنکشن سے اکمی تک ایلیویٹیڈ روڈ کی تعمیر کا کام شروع

دربھنگہ(فضا امام): دربھنگہ جنکشن سے اکمی تک ایلیویٹیڈ روڈ کی تعمیر کا عمل شروع ہو گیا ہے۔ اس کی تعمیر 1862 کروڑ روپے کی لاگت سے کی جائے گی۔ اس کی تعمیر سے عوام کو شہر میں روزانہ ہونے والے شدید ٹریفک جام سے نجات ملے گی۔ پیر کو یہ جانکاری دیتے ہوئے بہار حکومت کے سابق ریونیو اور لینڈ ریفارمز وزیر اور شہر کے ایم ایل اے سنجے سراوگی نے کہا کہ دربھنگہ شہر کے لوگوں کی یہ مانگ پرگتی یاترا کے دوران وزیر اعلیٰ نتیش کمار کو بتائی گئی تھی۔ جس کے بعد ایلیویٹڈ روڈ کی تعمیر کے لیے فنڈز کی منظوری دی گئی۔ سابق وزیر نے کہا کہ اس 13 کلو میٹر ایلیویٹڈ روڈ کی تعمیر کا عمل گبر کنسٹرکشن نے شروع کیا ہے۔مٹی کی جانچ بھی شروع کر دی گئی ہے۔ اب یہ تعمیراتی کام بتدریج آگے بڑھے گا۔ سابق وزیر نے کہا کہ یہ ایلیویٹیڈ روڈ دربھنگہ جنکشن سے شروع ہو کر ڈونر، بینٹا چوک، لہریاسرائے ٹاور، لوہیا چوک سے ایکمی تک جائے گی۔ ایلیویٹڈ روڈ فور لین کی صورت میں شہر کے باسیوں کے لیے تحفہ ہو گی۔ اس ایلیویٹیڈ روڈ کا ایک سرا اماس ایکسپریس وے سے بھی جڑے گا، تاکہ دوسرے اضلاع کے لوگوں کو NH 27 کے راستے شہر تک پہنچنے کے لیے جدوجہد نہ کرنی پڑے۔