ٹھٹھرتی سردی نے چھڑائی کپکپی: ریکارڈ توڑ ٹھنڈ کے باعث عوامی نقل و حرکت محدود

 دربھنگہ(فضا امام):-شدید سردی  پانچویں دن بھی ضلع میں معمولات زندگی کو درہم برہم کردیا۔ دھوپ کی کمی کی وجہ سے این ایچ 27 اور دیگر سڑکوں پر بہت کم گاڑیاں چلیں۔ سردی سے بچنے کے لیے لوگ دن بھر الاؤ کے پاس بیٹھے رہے۔ مسلسل شدید سردی کے باعث ہیٹر، گیزر وغیرہ کی فروخت بڑھ گئی ہے۔ پیر کو زیادہ سے زیادہ درجہ حرارت 20 اور کم سے کم 11 ڈگری سیلسیس ریکارڈ کیا گیا۔ دھند کے باعث فضائی خدمات بھی متاثر ہو رہی ہیں۔ خراب موسم کی وجہ سے کئی ٹرینیں بھی تاخیر سے چل رہی ہیں۔سواتنترتا سینانی سپر فاسٹ ٹرین، جو نئی دہلی سے دربھنگہ تک چلتی ہے، مقررہ وقت سے آٹھ گھنٹے تاخیر سے پہنچی۔ اسی طرح نئی دہلی سے دربھنگہ کے راستے چلنے والی ہمسفر ایکسپریس بھی مقررہ وقت سے تقریباً نو گھنٹے تاخیر سے پہنچی۔ شدید سردی کی وجہ سے سڑکیں سنسان ہو رہی ہیں اور زیادہ تر لوگ باہر نکلنے سے گریز کر رہے ہیں۔ سردی اور دھند کی وجہ سے دیہی سڑکوں پر ٹریفک میں مزید کمی آئی ہے، جن میں دربھنگہ-مظفر پور ہائی وے 27، مبی، نیشنل ہائی وے، -بھرواڑہ نیشنل ہائی وے، اور اتھربل-بشن پور ہائی وے شامل ہیں۔ سردی سے جانور اور پرندے بھی متاثر ہو رہے ہیں۔ مویشی مالکان اپنے مویشیوں کو چرانے کے لیے چراگاہوں میں نہیں لے جا رہے ہیں۔ سردی کا اثر بازاروں پر بھی پڑ رہا ہے۔ دیہی بازاروں میں ٹریفک کم ہو گئی ہے۔ تاجر اپنی دکانوں پر بیٹھے گاہکوں کا انتظار کر رہے ہیں۔ دکانداروں نے بتایا کہ سردی سے کاروبار متاثر ہو رہا ہے۔