تاثیر 11 دسمبر ۲۰۲۵:- ایس -ایم- حسن
بہار شریف (دانش)نالندہ میں جمعرات کی صبح ایک نامعلوم گاڑی نے سائیکل سوار کو ٹکر مار دی، جس کے نتیجے میں وہ موقع پر ہی جاں بحق ہو گیا۔ حادثے کے بعد گاؤں والوں نے غم و غصے کا اظہار کرتے ہوئے لاش کو سڑک پر رکھ کر بہارشریف سے پٹنہ جانے والی شاہراہ کو بند کر دیا۔ متوفی کی شناخت 45 سالہ دلیپ یادو کے طور پر ہوئی جو سِرسیا بیگھا گاؤں کے رہنے والے تھے۔اہلِ خانہ کے مطابق دلیپ یادو مزدوری کے لیے سائیکل پر بہارشریف جا رہے تھے کہ یمونا پر گاؤں کے قریب ایک تیز رفتار نامعلوم گاڑی نے انہیں روند ڈالا۔ حادثہ نُورسرائے تھانہ حدود میں گھر سے تقریباً سات کلو میٹر دور پیش آیا۔ واقعے کے بعد ایک گھنٹے تک سڑک پر جام لگا رہا اور دونوں طرف گاڑیوں کی قطاریں طویل ہوتی گئیں۔ اہلِ خانہ جب موقع پر پہنچے تو لاش دیکھ کر رونے دھونے کی فضا چھا گئی۔سڑک بند ہونے کی اطلاع ملتے ہی نُورسرائے کے انتظامی افسران، جن میں بلاک ترقیاتی افسر، حلقہ افسر، نُورسرائے تھانے کے انچارج اور پولیس ٹیم شامل تھی، فوراً جائے حادثہ پر پہنچے۔ افسران نے مشتعل افراد کو سمجھایا اور حالات کو قابو میں کیا۔ حکومت کی جانب سے اہلِ خانہ کو فوری امداد کے طور پر 20 ہزار روپے فراہم کیے گئے۔ پولیس نے لاش کو اپنے قبضے میں لے کر پوسٹ مارٹم کے لیے بہارشریف ماڈل اسپتال روانہ کر دیا۔