دوسرے ایشیز ٹیسٹ سے پہلے آسٹریلیا کا بڑا فیصلہ، ناتھن لائن باہر، نیسر اور انگلس کو موقع

تاثیر 4 دسمبر ۲۰۲۵:- ایس -ایم- حسن

برسبین، 4 دسمبر: ڈے نائٹ ایشیز ٹیسٹ کے لیے انگلینڈ نے ٹاس جیت کر پہلے بلے بازی کا فیصلہ کیا، لیکن میچ شروع ہونے سے پہلے آسٹریلیا نے چونکانے والا فیصلہ لیتے ہوئے تجربہ کار اسپنر ناتھن لائن کو ٹیم سے باہر کر دیا۔برسبین کے گابا میدان پر کھیلے جا رہے دوسرے ایشیز ٹیسٹ میں گھریلو شائقین کے سامنے مائیکل نیسر کی واپسی ہوئی ہے، جبکہ زخمی عثمان خواجہ کی جگہ جوش انگلس کو شامل کیا گیا ہے۔ انگلس پہلی بار اپنے گھریلو میدان پر ٹیسٹ کھیلیں گے اور انہیں بلے بازی کی ترتیب میں نمبر 7 پر اتارا جائے گا۔
ٹریوس ہیڈ پرتھ ٹیسٹ کی طرح اس میچ میں بھی اوپننگ کریں گے۔ہیڈ نے میچ سے پہلے کہا، ’’لگتا ہے کہ میں ہی اننگز کی شروعات کروں گا، میں نے اسی حساب سے تیاری کی ہے۔‘‘
یہ انگلس کا چوتھا ٹیسٹ اور پہلا ایشیز مقابلہ ہوگا، جبکہ نیسر 3 سال بعد بیگی گرین پہنتے نظر آئیں گے۔ خاص بات یہ ہے کہ نیسر کے اب تک تینوں ٹیسٹ میچ ڈے نائٹ رہے ہیں اور وہ پنک بال اسپیشلسٹ مانے جاتے ہیں۔کپتان پیٹ کمنز کی واپسی کی امید تھی، لیکن ان کی پیٹھ کی چوٹ پوری طرح ٹھیک نہیں ہونے کی وجہ سے انہیں ابھی بھی آرام دیا گیا ہے۔ لہٰذا اسٹیو اسمتھ ٹیم کی کمان سنبھالتے رہیں گے۔
38 سالہ ناتھن لائن کو لگاتار دوسرے پنک بال ٹیسٹ سے باہر کیا گیا ہے۔ سیزن کی شروعات میں آسٹریلیا نے کہا تھا کہ وہ لائن کو پھر سے باہر کرنے کا امکان کم رکھتے ہیں، لیکن پرتھ میں انہوں نے صرف 2 اوور پھینکے اور ٹیم مینجمنٹ نے پنک بال کنڈیشنز کو دیکھتے ہوئے نیسر پر بھروسہ جتایا۔