تاثیر 28 جنوری ۲۰۲۶:- ایس -ایم- حسن
بہار شریف (محمد دانش)نالندہ ضلع کے ترقی پسند کسان اور آشیرواد پولٹری اینڈ فیڈس کے منیجنگ ڈائریکٹر اثیر عالم کو زراعت کے شعبے میں ان کی نمایاں اور اختراعی خدمات کے اعتراف میں حکومتِ بہار کی جانب سے اعزاز سے نوازا گیا ہے۔ یہ اعزاز انہیں جدید زرعی تکنیک اپنانے، کم لاگت میں زیادہ پیداوار حاصل کرنے اور کسانوں کو خود کفیل بنانے کے لیے کی گئی مسلسل کوششوں کے سبب دیا گیا۔اثیر عالم طویل عرصے سے نامیاتی کھیتی، جدید ٹیکنالوجی اور سائنسی فکر کے ساتھ زراعت اور پولٹری فارمنگ کے شعبے میں سرگرم ہیں۔ ان کی کاوشوں سے نہ صرف نالندہ ضلع بلکہ اطراف و جوار کے علاقوں کے کسانوں کو بھی نئی سمت اور تحریک ملی ہے۔ انہوں نے یہ ثابت کر دکھایا ہے کہ جدید طریقوں کو اپنا کر کھیتی اور پولٹری کے کاروبار کو منافع بخش بنایا جا سکتا ہے۔اعزاز تقریب کے دوران حکومتِ بہار کے عہدیداروں نے اثیر عالم کے کاموں کی ستائش کرتے ہوئے کہا کہ ایسے ترقی پسند کسان ریاست کے زرعی نظام کی مضبوط بنیاد ہیں۔ انہوں نے امید ظاہر کی کہ یہ اعزاز نوجوانوں اور کسانوں کو زراعت کے میدان میں نئے تجربات اور اختراعات کی طرف راغب کرے گا۔اس کامیابی پر نالندہ ضلع میں خوشی کی لہر دوڑ گئی ہے۔ مقامی کسانوں، سماجی تنظیموں اور خیر خواہوں نے اثیر عالم کو مبارک باد پیش کی اور ان کے روشن مستقبل کے لیے نیک تمناؤں کا اظہار کیا۔