تاثیر 9 جنوری ۲۰۲۶:- ایس -ایم- حسن
جموں،09 جنوری :جموں و کشمیر میں سردی کی لہر جاری ہے۔گزشتہ چوبیس گھنٹوں کے دوران کم از کم درجہ حرارت میں نمایاں کمی ریکارڈ کی گئی، جبکہ سرینگر میں رواں موسم کی اب تک کی سب سے سرد رات دیکھی گئی، جہاں پارہ منفی 6 ڈگری سیلسیس تک گرگیا۔شدید سردی اور منفی درجہ حرارت کے باعث وادی کشمیر میں نلکوں کا پانی، سڑکوں پر جمع پانی اور کم گہرے آبی ذخائر منجمد ہو گئے۔ محکمہ موسمیات کے مطابق زیادہ سے زیادہ اور کم سے کم درجہ حرارت کے درمیان فرق میں کمی آئی ہے، کیونکہ جمعرات کو سرینگر میں زیادہ سے زیادہ درجہ حرارت 11.2 ڈگری سیلسیس ریکارڈ کیا گیا۔محکمہ موسمیات نے 20 جنوری تک عمومی طور پر سرد اور خشک موسم کی پیش گوئی کی ہے، تاہم بالائی علاقوں میں کہیں کہیں ہلکی بارش یا برف باری کا امکان ظاہر کیا گیا ہے۔طویل خشک موسم نے تشویش میں اضافہ کر دیا ہے، کیونکہ 40 روزہ شدید سردی کے دورانیے ’چِلے کلاں‘ کا نصف حصہ گزر چکا ہے، لیکن میدانی علاقوں میں اب تک موسم کی پہلی برف باری نہیں ہوئی۔