تاثیر 9 جنوری ۲۰۲۶:- ایس -ایم- حسن
جموں، 09 جنوری : آل انڈیا کانگریس کمیٹی کی اپیل پر ملک گیر 45 روزہ احتجاجی تحریک کے تحت جموں میں آج منریگا بچاؤ مہم کا باقاعدہ آغاز کیا گیا۔ اس مہم کی قیادت کانگریس کی سینئر قیادت نے کی، جس میں جموں و کشمیر انچارج اور رکن پارلیمان ڈاکٹر سید ناصر حسین اور جموں و کشمیر پردیش کانگریس کمیٹی کے صدر طارق حمید قرا پیش پیش رہے۔جموں کے پلوڑا علاقے میں واقع کشمیر ہلز ریزورٹ میں منعقدہ پروگرام میں پارٹی کے سینئر رہنماؤں، موجودہ و سابق اراکین اسمبلی، سابق وزراء، نومنتخب ضلعی صدور، فرنٹل تنظیموں کے عہدیداروں، بلاک صدور اور بڑی تعداد میں کانگریس کارکنوں نے شرکت کی۔
اس موقع پر خطاب کرتے ہوئے ڈاکٹر سید ناصر حسین نے کہا کہ یو پی اے حکومت نے سابق وزیر اعظم ڈاکٹر منموہن سنگھ کی قیادت میں آئین کی روح کے مطابق عوام کو قانونی حقوق اور ضمانتیں فراہم کرنے کے لیے کئی تاریخی قوانین نافذ کیے تھے، جن میں منریگا (حقِ روزگار)، حقِ اطلاعات، حقِ تعلیم، قومی غذائی تحفظ قانون اور جنگلاتی حقوق قانون شامل ہیں۔ انہوں نے الزام عائد کیا کہ موجودہ مودی حکومت ان آئینی اور قانونی حقوق کو منظم طریقے سے کمزور یا ختم کرنے کی کوشش کر رہی ہے۔