تاثیر 1 فروری ۲۰۲۶:- ایس -ایم- حسن
غازی آباد، 31 جنوری : اترپردیش میں غازی آباد ضلع کے کھوڑا تھانہ علاقے میں جمعہ کی دیر رات امبیڈکر گیٹ کے نزدیک واقع ویشنو ڈھابے پر دو نوجوانوں کا قتل کر دیا گیا۔ واقعے میں ایک دیگر نوجوان زخمی ہے۔ پولیس نے اسے اسپتال میں علاج کے لیے داخل کرایا۔ پولیس واقعے میں شامل ملزمان کی تلاش میں چھاپے ماری کر رہی ہے۔ کچھ لوگوں کو پولیس نے حراست میں لیا ہے۔
پولیس ڈپٹی کمشنر ٹرانس ہنڈن نمش پاٹل نے ہفتہ کو بتایا کہ کھوڑا تھانہ علاقے کے امبیڈکر گیٹ کے نزدیک کاغذ مارکیٹ کی گلی میں ویشنو ڈھابہ ہے۔ وہاں پر جمعہ کی دیر رات کو دو فریقوں میں کہاسنی ہو گئی تھی۔ اسی درمیان دونوں فریقوں میں تنازعہ اتنا بڑھ گیا کہ ایک فریق نے دوسرے فریق کے نوجوانوں پر حملہ کر دیا۔ اس واقعے میں 3 نوجوان شدید طور پر زخمی ہو گئے۔ وہاں موجود لوگوں نے بتایا کہ نوجوانوں پر حملہ چاقو اور پتھروں سے کیا گیا تھا۔ اس حملے میں ستیم، شری پال اور انوراگ زخمی ہو گئے۔ واردات کو انجام دینے کے بعد ملزمان پیدل ہی وہاں سے فرار ہوگئے۔ واقعے کے بعد آس پاس کے لوگوں نے پولیس کو اطلاع دی۔ موقع پر پہنچی پولیس زخمیوں کو قریبی اسپتال لے کر پہنچی۔ اسپتال میں ستیم اور شری پال کی علاج کے دوران موت ہو گئی جبکہ زخمی انوراگ کا علاج چل رہا ہے۔