تاثیر 1 فروری ۲۰۲۶:- ایس -ایم- حسن
کولکاتا، 31 جنوری : مرکزی وزیر داخلہ امت شاہ نے ہفتہ کو ممتا بنرجی کی قیادت والی ترنمول کانگریس (ٹی ایم سی) حکومت پر حملہ کیا۔ انہوں نے الزام لگایا کہ ٹی ایم سی حکومت دراندازوں کو تحفظ دے رہی ہے اور بدعنوانی کو ادارہ بنا دیا گیا ہے۔ انہوں نے کہا کہ انتخابی فوائد کے لیے سرحدی حفاظتی اقدامات کو جان بوجھ کر روکا جا رہا ہے۔
ہفتہ کو شمالی 24 پرگنہ ضلع کے بیرک پور میں بی جے پی کارکنوں کی میٹنگ سے خطاب کرتے ہوئے امت شاہ نے دعویٰ کیا کہ ٹی ایم سی حکومت کا آئندہ اسمبلی انتخابات میں شکست یقینی ہے۔ انہوں نے کہا کہ مغربی بنگال میں بی جے پی کی حکومت کا قیام نہ صرف ریاست بلکہ پورے ملک کی قومی سلامتی کے لیے ضروری ہے۔
امت شاہ نے کہا کہ مغربی بنگال میں دراندازی پورے ملک کے لئے ایک بڑا سیکورٹی مسئلہ بن گیا ہے۔ انہوں نے الزام لگایا کہ عدالتی حکم کے باوجود ٹی ایم سی حکومت بی ایس ایف کو سرحد پر باڑ بنانے کے لیے زمین فراہم نہیں کر رہی ہے کیونکہ درانداز اس کا ووٹ بینک ہیں۔