تاثیر 27 فروری ۲۰۲۶:- ایس -ایم- حسن
ممبئی ، 27 فروری :مراٹھی کو صرف ثقافتی زبان تک محدود نہ رکھتے ہوئے اسے روزگار، کاروبار اور عالمی شناخت کی زبان بنانے کے لیے حکومت عملی اقدامات کر رہی ہے، نائب وزیر اعلیٰ ایکناتھ شندے نے مراٹھی بھاشا گورو دن کے موقع پر منعقدہ خصوصی تقریب میں یہ اعلان کیا۔ قانون ساز اسمبلی میں منعقد پروگرام ‘جاوے وِنوداچیا گاوا’ کے دوران انہوں نے مراٹھی کے فروغ کے لیے جاری پالیسی اقدامات کی تفصیل پیش کی۔
تقریب میں وزیر اعلیٰ دیویندر فڑنویس، نائب وزیر اعلیٰ سْنیتراتا?ی پوار، رام شندے، راہْل نارویکر، نیلم گورھے، چندرکانت پاٹل، اْدے سامنت، آشو توش کالے اور دیگر معززین شریک ہوئے۔
شندے نے مراٹھی کو تہذیبی ورثہ قرار دیتے ہوئے کْسْماگراج کے اشعار کا حوالہ دیا اور زبان کی خدمت کرنے والے تمام اہلِ علم کو خراجِ تحسین پیش کیا۔
انہوں نے کہا کہ ریاستی حکومت نے مراٹھی کو کلاسیکی زبان کا درجہ دلانے کے لیے مستقل جدوجہد کی اور مادری زبان میں تعلیم کو فروغ دینے کو ناگزیر قرار دیا۔ ان کے مطابق مراٹھی کو انتظامیہ، تعلیم، ٹیکنالوجی اور اقتصادی سرگرمیوں میں مؤثر طور پر نافذ کرنے کے لیے حکمت عملی تیار کی گئی ہے۔انہوں نے بتایا کہ مراٹھی ادب کے تراجم، عالمی مراٹھی ساہتیہ سمیلن کے ذریعے دنیا بھر کے مراٹھی بولنے والوں کو جوڑنے، اور مختلف علمی انسائیکلوپیڈیاز کی تیاری جیسے اقدامات جاری ہیں۔
انہوں نے کہا کہ مراٹھی کی مختلف بولیاں — خان دیشی، مالوانی، کونکنی اور وڑہاری — اس کی اصل طاقت ہیں اور جدید وسائل کے استعمال سے اس کی شہرت کو عالمی سطح تک پہنچایا جا سکتا ہے۔مراٹھی مزاح کی روایت کا ذکر کرتے ہوئے انہوں نے کہا کہ مشکلات میں بھی مزاح تلاش کرنا مراٹھی انسان کی پہچان ہے۔