سیتامڑھی میں پہلا الیکٹرک گاڑی چارجنگ اسٹیشن قائم، عوام کو بڑی سہولت

سیتامڑھی،( مظفر عالم)

سیتامڑھی کے سورسنڈ علاقے میں پہلا الیکٹرک گاڑی چارجنگ اسٹیشن باقاعدہ طور پر شروع کر دیا گیا ہے۔ اس جدید سہولت کا افتتاح ضلع مجسٹریٹ رچی پانڈے اور رکنِ پارلیمنٹ دیویش چندر ٹھاکر نے فیتہ کاٹ کر کیا۔

یہ چارجنگ اسٹیشن بھارت  پٹرولنگ (بی پی سی ایل) کی جانب سے قائم کیا گیا ہے۔ حکام کے مطابق اس منصوبے کا مقصد ضلع میں الیکٹرک گاڑیوں کے استعمال کو فروغ دینا اور لمبے سفر کرنے والے مسافروں کو آسان اور محفوظ چارجنگ کی سہولت فراہم کرنا ہے۔

اس اسٹیشن کے قیام سے نہ صرف مقامی باشندوں کو فائدہ ہوگا بلکہ قومی و ریاستی شاہراہ سے گزرنے والے مسافروں کو بھی اب گاڑی کی چارجنگ کے لیے پریشان نہیں ہونا پڑے گا۔ اس اقدام سے علاقے میں جدید ٹیکنالوجی کے استعمال کو بھی تقویت ملے گی۔

ماہرین کے مطابق الیکٹرک گاڑیوں کے بڑھتے رجحان سے فضائی آلودگی میں کمی آئے گی اور ماحول کو صاف رکھنے میں مدد ملے گی۔ ساتھ ہی پیٹرول اور ڈیزل کے مقابلے میں الیکٹرک گاڑیاں کم خرچ ثابت ہوتی ہیں، جس سے عام شہریوں کو مالی فائدہ بھی ہوگا۔

ضلع سیتامڑھی میں اس چارجنگ اسٹیشن کی شروعات کو جدید اور پائیدار ترقی کی سمت ایک اہم قدم قرار دیا جا رہا ہے۔ مقامی لوگوں نے اس فیصلے کا خیرمقدم کرتے ہوئے امید ظاہر کی ہے کہ مستقبل میں ضلع کے دیگر اہم مقامات پر بھی ایسے چارجنگ اسٹیشن قائم کیے جائیں گے تاکہ عوام کو مزید سہولت حاصل ہو سکے۔