دربھنگہ نگر نگم حلقہ میں جی آئی ایس پر مبنی پراپرٹی سروے کا آغاز، شہر کا ڈیجیٹل پراپرٹی ریکارڈ تیار ہوگا

 دربھنگہ(فضاامام):دربھنگہ نگر نگم کے تحت شہری علاقے میں (جیوگرافیکل انفارمیشن سسٹم) پر مبنی پراپرٹی سروے کا عمل تیزی سے جاری ہے، جس کا بنیادی مقصد شہر کی تمام پراپرٹیز کا درست، مستند اور جدید ڈیجیٹل ریکارڈ تیار کرنا ہے۔ اس سروے سے شہر کو ڈیجیٹل نظام سے جوڑتے ہوئے شہری نظم و نسق کو مزید مضبوط اور شفاف بنایا جائے گا۔ سروے کا آغاز وارڈ نمبر 25 سے کیا گیا ہے اور آئندہ دنوں میں مرحلہ وار تمام وارڈوں کو اس کے دائرے میں لایا جائے گا۔محکمہ شہری ترقی و ہاؤسنگ کی جانب سے نامزد ایجنسی GIS Consortium کی خصوصی تربیت یافتہ ٹیم نگر نگم کے اہلکاروں کے تعاون سے گھر گھر جا کر سروے کر رہی ہے۔ سروے کے دوران ہر جائیداد کی جغرافیائی پوزیشن، رقبہ، عمارت کی نوعیت، استعمال کی حالت (رہائشی، تجارتی یا سرکاری)، تعمیر کی تفصیلات اور دیگر ضروری معلومات کو ڈیجیٹل شکل میں محفوظ کیا جا رہا ہے۔ اس کے ساتھ جدید GIS میپنگ ٹیکنالوجی کے ذریعے شہر کا جامع ڈیجیٹل نقشہ بھی تیار کیا جا رہا ہے۔نگر نگم ذرائع کے مطابق اس سروے کے مکمل ہونے کے بعد پراپرٹی ٹیکس کے نظام میں بہتری آئے گی، محصولات میں اضافہ ہوگا اور شہری سہولیات جیسے سڑک، نکاسی آب، صفائی اور اسٹریٹ لائٹ کی منصوبہ بندی زیادہ مؤثر طریقے سے کی جا سکے گی۔ اس کے علاوہ ناجائز تعمیرات پر نظر رکھنے، تجاوزات کی نشاندہی اور ترقیاتی منصوبوں کے نفاذ میں بھی یہ ڈیٹا نہایت معاون ثابت ہوگا۔نگر نگم انتظامیہ نے واضح کیا ہے کہ سروے کے دوران حاصل کی جانے والی تمام معلومات کو محفوظ رکھا جائے گا اور اسے صرف سرکاری مقاصد کے لیے استعمال کیا جائے گا۔ شہریوں سے گزارش کی گئی ہے کہ وہ سروے ٹیم کے شناختی کارڈ کی تصدیق کے بعد انہیں مکمل تعاون فراہم کریں اور درست معلومات مہیا کریں، تاکہ دربھنگہ شہر کے لیے ایک شفاف، منظم اور جدید ڈیجیٹل پراپرٹی ریکارڈ تیار کیا جا سکے، جو مستقبل میں شہری ترقی کی مضبوط بنیاد بنے گا۔