تاثیر 4 فروری ۲۰۲۶:- ایس -ایم- حسن
بھوپال، 04 فروری :مدھیہ پردیش کانگریس کمیٹی کے صدر جیتو پٹواری نے منگل کو پریس کانفرنس سے خطاب کرتے ہوئے مرکز اور ریاست کی بی جے پی حکومتوں پر کسانوں، نوجوانوں اور عام عوام کو نظر انداز کرنے کا سنگین الزام لگایا۔ انہوں نے کہا کہ آج ملک اور ریاست میں سب سے زیادہ متاثر طبقہ کسان، نوجوان اور عام شہری ہیں، جنہیں بی جے پی حکومتوں نے پوری طرح نظر انداز کر دیا ہے۔
جیتو پٹواری نے بدھ کو میڈیا سے بات چیت کے دوران امریکہ کے وزیر زراعت کے حالیہ بیان کا حوالہ دیتے ہوئے کہا کہ ہندوستان-امریکہ ٹریڈ ڈیل بے حد تشویشناک ہے۔ اس معاہدے کے تحت امریکہ سے ہندوستان آنے والے زرعی مصنوعات پر صفر فیصد ٹیرف لگے گا۔ ان میں ڈرائی فروٹس، پھل-سبزیاں، شراب، اسپرٹ، صنعتی مصنوعات، کیمیکل اور طبی آلات شامل ہیں۔ وہیں ہندوستان میں پیدا ہونے والی زرعی اشیاء پر امریکہ میں 18 فیصد تک ٹیکس لگایا جائے گا۔ انہوں نے سوال اٹھایا کہ جب امریکہ کے وزیر زراعت اس ڈیل پر کھل کر بول رہے ہیں، تو ہندوستان کے وزیر زراعت، جو خود مدھیہ پردیش کے سابق وزیر اعلیٰ بھی رہ چکے ہیں، اس پر خاموش کیوں ہیں۔ یہ خاموشی کس کے دباو میں ہے، یہ عوام جاننا چاہتی ہے۔
جیتو پٹواری نے کہا کہ اپوزیشن لیڈر راہل گاندھی پہلے ہی متنبہ کر چکے تھے کہ یہ ٹریڈ ڈیل ہندوستان کے مفادات کے خلاف ہوگی اور وزیر اعظم نریندر مودی بین الاقوامی دباؤ میں جھکیں گے۔ آج یہ بات صحیح ثابت ہو رہی ہے۔ انہوں نے کہا کہ اگر امریکہ سے سستی زرعی پیداوار صفر فیصد ٹیکس پر ہندوستان آئے گی، تو ملک کے کسانوں کی آمدنی پوری طرح ختم ہو جائے گی۔ کانگریس پارٹی کسانوں کے مفادات کے ساتھ کسی بھی طرح کے سمجھوتے کے خلاف سڑکوں پر اتر کر فیصلہ کن تحریک چلائے گی۔