تاثیر 15 فروری ۲۰۲۶:- ایس -ایم- حسن
جموں،15 فروری (ہ س)۔لداخ کے لیفٹیننٹ گورنر کویندر گپتا نے آل لداخ اسٹوڈنٹس ویلفیئر ایسوسی ایشن جموں کے 27ویں سالانہ یومِ تاسیس تقریب سے خطاب کرتے ہوئے ایسوسی ایشن کی جانب سے لداخی طلبہ کی فلاح، اتحاد اور ہمہ جہت ترقی کے لیے کی جانے والی مسلسل خدمات کو سراہا۔تقریب میں ایسوسی ایشن سے وابستہ نوجوانوں سے خطاب کرتے ہوئے لیفٹیننٹ گورنر نے کہا کہ یہ تنظیم صرف ایک ادارہ نہیں بلکہ لداخی نوجوانوں کے عزم، نظم و ضبط اور روشن مستقبل کے خوابوں کی عکاس ہے۔ انہوں نے 2015 سے طلبہ کو تعلیمی رہنمائی، ثقافتی ہم آہنگی اور انتظامیہ کے سامنے ان کے مسائل مؤثر انداز میں پیش کرنے میں ایسوسی ایشن کے کردار کو قابلِ ستائش قرار دیا۔
کویندر گپتا نے کہا کہ طالب علمی قوم سازی کی بنیاد ہے، جو کردار سازی، نظم و ضبط اور معاشرے کے لیے ذمہ داری کا احساس پیدا کرتی ہے۔ انہوں نے نوجوانوں کو چیلنجز سے سیکھنے اور قومی خدمت کے لیے خود کو مضبوط بنانے پر زور دیا۔