تاثیر 27 فروری ۲۰۲۶:- ایس -ایم- حسن
جموں, 27 فروری :جموں و کشمیر کے لیفٹیننٹ گورنر منوج سنہا نے جمعہ کو جموں یونیورسٹی میں دو روزہ یوتھ فیسٹیول گونج 2026 کا افتتاح کیا اور جموں و کشمیر کے نوجوانوں کو بااختیار بنانے کے عزم کا اعادہ کیا۔
لیفٹیننٹ گورنر کے دفتر کی جانب سے جاری بیان کے مطابق یہ فیسٹیول مختلف شعبہ ہائے زندگی سے تعلق رکھنے والے نوجوانوں کو ایک مشترکہ پلیٹ فارم فراہم کرتا ہے تاکہ وہ باہمی اشتراک سے ایک مستقبل کی تشکیل کر سکیں۔ تقریب کا مقصد نوجوانوں کی فکری آبیاری، جسمانی توانائی کے فروغ اور اختراعی صلاحیتوں کو جلا بخشنا ہے۔
افتتاحی تقریب سے خطاب کرتے ہوئے منوج سنہا نے کہا کہ بااختیار نوجوان ہی قوم کے روشن مستقبل کی ضمانت ہوتے ہیں۔ انہوں نے زور دے کر کہا کہ قومی ترقی کے لیے فکری گہرائی، تخلیقی قوت اور جدت پسند نوجوان قیادت کلیدی اہمیت رکھتی ہے۔ ان کا کہنا تھا کہ پائیدار ترقی اور طویل مدتی استحکام کے حصول کے لیے متوازن ذہنوں اور جرات مند موجدین کی تربیت ناگزیر ہے۔