تاثیر 13 فروری ۲۰۲۶:- ایس -ایم- حسن
جموں, 13 فروری (ہ س)جموں و کشمیر حکومت نے جمعہ کے روز جموں و کشمیر قانون ساز اسمبلی کو آگاہ کیا کہ کسان کریڈٹ کارڈ کے تحت حاصل کردہ قرضوں کی معافی سے متعلق کسی بھی تجویز پر غور نہیں کیا جا رہا ہے۔یہ وضاحت رکن اسمبلی ڈاکٹر دیویندر کمار منیال کے سوال کے جواب میں دی گئی، جنہوں نے حالیہ سیلاب اور قومی شاہراہ کی طویل بندش کے باعث زراعت اور باغبانی کے شعبوں کو ہونے والے نقصانات کے تناظر میں قرض معافی کے امکان کے بارے میں استفسار کیا تھا۔
تحریری جواب میں محکمہ زراعت نے بتایا کہ فی الحال ایسی کوئی تجویز زیر غور نہیں ہے۔ محکمہ کے مطابق کسان کریڈٹ کارڈ پروگرام حکومت ہند کی ایک اہم مالیاتی اسکیم ہے، جس کا مقصد کسانوں کو زراعت اور متعلقہ سرگرمیوں کے لیے بروقت اور کم لاگت پر ادارہ جاتی مالی سہولت فراہم کرنا ہے۔
محکمہ نے مزید وضاحت کی کہ یہ اسکیم نامزد بینکوں کے ذریعے چلائی جاتی ہے اور اس کا مالی دائرہ اختیار براہِ راست مرکزی زیر انتظام علاقے کی انتظامیہ کے تحت نہیں آتا ہے۔بیان میں کہا گیا کہ اس اسکیم کے تحت فصلوں کے قرض کم شرح سود پر فراہم کیے جاتے ہیں اور بروقت ادائیگی کی صورت میں مرکزی اصولوں کے مطابق سود میں رعایت بھی دی جاتی ہے۔