تاثیر 28 مارچ ۲۰۲۶:- ایس -ایم- حسن
واشنگٹن، 28 مارچ : جمعہ کو ایران کی جانب سے سعودی عرب میں امریکی تنصیب پرنس سلطان فضائی اڈے پر کیے گئے میزائلوں اور ڈرون حملوں میں دس امریکی فوجی شدید زخمی ہوگئے ہیں۔ زخمیوں میں سے دو کی حالت تشویشناک ہے۔ میڈیا رپورٹ کے مطابق امریکی حکام نے بتایا کہ حملہ الخرج میں سعودی فوج کے شہزادہ سلطان ایئر بیس پر ہوا، خاص طور پر اس عمارت کو نشانہ بنایا گیا جہاں امریکی فوجی تعینات تھے۔ ایران نے اس حملے کو انجام دینے کے لیے میزائلوں اور ڈرونز کا استعمال کیا، جس کے نتیجے میں کم از کم دو کے سی-135 فضائی ایندھن بھرنے والے طیاروں کو بھی کافی نقصان پہنچا۔
امریکی فضائیہ کا 378 واں فضائی بیڑا 2019 سے شہزادہ سلطان بیس پر تعینات ہے۔ تقریباً ایک ماہ قبل ایران کے ساتھ جنگ شروع ہونے کے بعد سے، 300 سے زائد امریکی زخمی، اور 13 ہلاک ہو چکے ہیں۔ اس واقعے سے قبل سعودی عرب میں شہزادہ سلطان ایئر بیس پر ایک الگ حملے میں ایک امریکی فوجی زخمی ہوا تھا جو بعد میں زخموں کی تاب نہ لاتے ہوئے چل بسا۔ اسکے علاوہ پرنس سلطان ایئر بیس پر ایک واضح حملے کے نتیجے میں 14 افراد زخمی ہوئے۔ دریں اثنا، لڑائی شروع ہونے کے چند گھنٹے بعد، کویت میں ایک امریکی تنصیب پر ایرانی حملے میں مزید چھ افراد ہلاک ہو گئے۔ عراق میں امریکی ایندھن بھرنے والے طیارے کے حادثے میں مزید چھ افراد ہلاک ہو گئے۔