تاثیر 30 مارچ ۲۰۲۶:- ایس -ایم- حسن
سرینگر 29 مارچ:شمالی کشمیر کے بانڈی پورہ ضلع کے اونچے علاقوں میں تازہ برف باری نے گریز سیکٹر کے کچھ حصوں میں معمولات زندگی کو ٹھپ کر دیا ہے۔ حکام نے بتایا کہ وادی تلیل میں تقریباً 2 انچ برفباری ریکارڈ کی گئی، جبکہ رازدان ٹاپ میں تقریباً 4 انچ برف باری ہوئی۔خراب موسم اور مسلسل بارش اور برف باری کی پیشین گوئیوں کے پیش نظر، حکام نے احتیاطی اقدام کے طور پر 85 کلومیٹر طویل بانڈی پورہ – گریز سڑک پر گاڑیوں کی آمدورفت معطل کر دی ہے۔ سب ڈویژنل مجسٹریٹ (ایس ڈی ایم) گریز، ڈاکٹر مختار احمد نے کہا کہ یہ فیصلہ مسافروں کی حفاظت کو یقینی بنانے اور سڑک کی پھسلن اور کم نمائش کے درمیان کسی بھی ناخوشگوار واقعے کو روکنے کے لیے کیا گیا ہے۔ انہوں نے کہا کہ بانڈی پورہ – گریز روڈ پر آمد و رفت اگلے احکامات تک معطل رہے گی۔ انتظامیہ نے ایک ایڈوائزری جاری کرتے ہوئے رہائشیوں اور مسافروں پر زور دیا ہے کہ وہ سڑک پر غیر ضروری نقل و حرکت سے گریز کریں اور جب تک موسم کی صورتحال بہتر نہیں ہو جاتی اور سڑک کو ٹریفک کے لیے محفوظ قرار نہیں دیا جاتا تب تک سرکاری ہدایات پر سختی سے عمل کریں۔دریں اثنا، برف باری کے تازہ سلسلے کی وجہ سے پورے خطے میں درجہ حرارت میں نمایاں کمی واقع ہوئی ہے، حکام صورتحال پر گہری نظر رکھے ہوئے ہیں۔