تاثیر 08 مارچ ۲۰۲۶:- ایس -ایم- حسن
سرینگر، 08 مارچ ::۔حکومت نے کشمیر خطے میں تمام تعلیمی اداروں کو پیر کو دوبارہ کھولنے کا فیصلہ کیا۔ یہ فیصلہ حکومت کی جانب سے احتیاطی تدابیر کے طور پر تمام تعلیمی اداروں کو بند کرنے کا حکم دینے کے ایک ہفتے بعد آیا ہے۔ وزیر تعلیم سکینہ ایتو نے کہا کہ کشمیر خطے کے تمام اضلاع میں اسکول، کالج اور یونیورسٹیاں پیر کو دوبارہ کھلیں گی۔ انہوں نے کہا کہ زمینی صورتحال کا جائزہ لینے کے بعد ہم نے پیر سے کشمیر کے تمام اضلاع میں تعلیمی ادارے دوبارہ کھولنے کا فیصلہ کیا ہے۔ اس سے قبل ایک ہفتہ قبل حکومت نے کشمیر کے تمام خطوں میں اسکولوں اور کالجوں کو بند کرنے کا حکم دیا تھا تاکہ طلباء کی حفاظت کو یقینی بنایا جاسکے۔ واضح رہے ایران کے سپریم لیڈر آیت اللہ علی خامنہ ای کی امریکہ اور اسرائیل کے مشترکہ حملوں میں ہلاکت کے بعد جموں و کشمیر میں وسیع پیمانے پر احتجاج شروع ہو گیا تھا۔ قابل ذکر بات یہ ہے کہ آٹھویں جماعت تک کے اسکول دو ماہ سے زیادہ کی موسم سرما کی تعطیل کے بعد کل سے دوبارہ کھلیں گے۔اس سے قبل 23 فروری کو، 9ویں سے 12ویں جماعت تک کے اسکولوں نے کشمیر ڈویژن اور جموں ڈویژن کے سرمائی علاقوں میں 70 دنوں سے زائد کی موسم سرما کی تعطیل کے بعد تعلیمی سرگرمیاں دوبارہ شروع کی تھیں۔حکومت نے نویں جماعت اور اس کے بعد کے طلباء کو دسمبر 11-2025 سے فروری 22-2026 تک موسم سرما کی تعطیلات کا حکم دیا تھا۔ 25 نومبر کو سکول ایجوکیشن ڈیپارٹمنٹ نے کشمیر ڈویژن اور جموں ڈویژن کے سرمائی زونوں کے لیے مرحلہ وار موسم سرما کی تعطیلات کا اعلان کیا تھا۔