تاثیر 05 مارچ ۲۰۲۶:- ایس -ایم- حسن
اورنگ آباد ، 5 مارچ:اورنگ آباد ضلع میں موجود تمام 9 پنچایت سمیتیوں کے صدر اور نائب صدر کے انتخاب کے لیے 10 مارچ کو دوپہر 2 بجے خصوصی اجلاس منعقد کیے جائیں گے۔ یہ اجلاس متعلقہ پنچایت سمیتیوں کے اجلاس ہال میں منعقد ہوں گے جہاں ارکان کی موجودگی میں انتخابی عمل مکمل کیا جائے گا۔
اس سلسلے میں ضلع کلکٹر نے ہر تعلقہ کے لیے الگ الگ صدارت افسر مقرر کیے ہیں جو اجلاس کی صدارت کرتے ہوئے انتخابی کارروائی کو انجام دیں گے۔ صدر کے عہدے کے لیے ریزرویشن بھی پہلے ہی طے کر دیا گیا ہے۔
انتظامیہ کے مطابق صدر اور نائب صدر کے عہدوں کے لیے نامزدگی فارم اجلاس شروع ہونے سے دو گھنٹے پہلے تک قبول کیے جائیں گے۔ اس کے بعد ارکان کی موجودگی میں انتخابی عمل کا آغاز ہوگا۔