تاثیر 23 مارچ ۲۰۲۶:- ایس -ایم- حسن
پونے ، 23 مارچ : مہاراشٹر کے پونے ضلع میں پونے-ناسک ہائی وے پر پیش آئے ایک دردناک سڑک حادثے میں ایک ہی خاندان کے تین افراد کی جان چلی گئی، جبکہ دو بچے زخمی حالت میں زیر علاج ہیں۔ یہ حادثہ 22 مارچ کی دیر رات مانچر علاقے میں پیش آیا، جب ایک کار مخالف سمت میں جا کر ایک نجی بس سے ٹکرا گئی۔ پولیس کے مطابق کار ڈرائیور کا گاڑی پر کنٹرول اچانک ختم ہو گیا تھا، جس کے نتیجے میں گاڑی ڈیوائیڈر عبور کر کے سامنے سے آنے والی بس سے جا ٹکرائی۔
اطلاعات کے مطابق پمپر ی-چنچوڑ کے رہائشی ملیکارجن امبیگاوے اپنے اہل خانہ کے ساتھ ناسک میں ایک تقریب میں شرکت کے بعد واپس لوٹ رہے تھے کہ راستے میں یہ حادثہ پیش آ گیا۔ حادثے میں ملیکارجن امبیگاوے، ان کی اہلیہ آرتی امبیگاوے اور ان کی والدہ لتا تپلونڈھے موقع پر ہی دم توڑ گئے، جبکہ ان کے دو بچے شدید زخمی ہو گئے، جنہیں فوری طور پر اسپتال منتقل کیا گیا جہاں ان کا علاج جاری ہے۔
واقعے کی اطلاع ملتے ہی مانچر پولیس جائے حادثہ پر پہنچی اور لاشوں کو پوسٹ مارٹم کے لیے روانہ کیا، جبکہ زخمی بچوں کو فوری طبی امداد فراہم کی گئی۔ پولیس حکام کا کہنا ہے کہ حادثے کی اصل وجوہات جاننے کے لیے تحقیقات جاری ہیں اور تمام پہلوؤں کا باریک بینی سے جائزہ لیا جا رہا ہے۔