تاثیر 02 مارچ ۲۰۲۶:- ایس -ایم- حسن
علی گڑھ، 2 مارچ: علی گڑھ مسلم یونیورسٹی کی نیشنل سروس اسکیم (این ایس ایس) یونٹ نے اعضاء کے عطیہ سے متعلق ایک بیداری لیکچر کا اہتمام کیا۔
پروگرام میں پرو وائس چانسلر پروفیسر محمد محسن خان (سرپرست)، ڈاکٹر محمد محسن خان، کوآرڈینیٹر این ایس ایس، پروفیسر ملک شعیب احمد، ممبر انچارج، بلڈنگ ڈپارٹمنٹ اور روٹیرین لال گوئل نے شرکت کی، جنہوں نے کلیدی خطبہ پیش کیا۔ مقررین نے اعضا کے عطیہ کے سائنسی، قانونی اور اخلاقی پہلوؤں پر تفصیل سے روشنی ڈالی اور نوجوانوں کو ذمہ داری کے ساتھ معاشرے کی خدمت میں حصہ لینے کی ترغیب دی۔ کلیدی مقرر مسٹر لال گوئل نے کہا کہ عضو عطیہ کرنے والا ایک فرد کئی زندگیوں کے لیے امید کی کرن ثابت ہو سکتا ہے۔ معزز مہمانوں نے سماجی بیداری کے فروغ میں این ایس ایس رضاکاروں کے فعال کردار کو سراہا۔ اس موقع پر اے ایم یو کی طالبہ، این ایس ایس رضاکار اور وِکست بھارت یوتھ پارلیمنٹ کے ضلعی مرحلے میں پہلی پوزیشن حاصل کرنے والی نوشین شان کو اعزاز سے نوازا گیا اور ریاستی سطح پر نمایاں کارکردگی کے لیے ان کی حوصلہ افزائی کی گئی۔ پروگرام کا اختتام سوال و جواب کے سیشن کے ساتھ ہوا۔ نظامت ڈاکٹر فوزیہ فریدی نے کی، جبکہ ڈاکٹر محمد محسن خان نے یونیورسٹی انتظامیہ اور شرکاء کا شکریہ ادا کیا۔ پروگرام افسران ڈاکٹر منصور عالم، ڈاکٹر عبدالجبار، محمد عمران خان اور ناہید اکبری بھی اس موقع پر موجود تھے۔