تاثیر 12 مارچ ۲۰۲۶:- ایس -ایم- حسن
استنبول، 12 مارچ:امریکہ، اسرائیل اور ایران کے درمیان جاری جنگ کے درمیان تھائی لینڈ نے بدھ کے روز آبنائے ہرمز میں ایک بحری جہاز پر حملے کے حوالے سے ایران سے وضاحت طلب کی ہے۔ واقعے کے وقت جہاز میں کل 23 افراد سوار تھے جن میں سے عملے کے تین ارکان لاپتہ ہیں جب کہ دیگر کو بچا لیا گیا ہے۔ اس واقعے نے مشرقی ایشیا کے سمندری علاقوں میں انتہائی حساس صورتحال پیدا کر دی ہے۔ ترکی کی سرکاری خبر رساں ایجنسی انادولو نے اطلاع دی ہے کہ بنکاک نے جمعرات کو ایران سے وضاحت طلب کی اور آبنائے ہرمز میں تھائی پرچم والے جہاز پر بدھ کے روز حملے کے بعد احتجاج درج کرایا، جس میں عملے کے کم از کم تین ارکان لاپتہ ہو گئے۔ میڈیا رپورٹس کے مطابق تھائی لینڈ کے 23 رکنی عملے کو لے جانے والی میوری ناری پر اس وقت حملہ کیا گیا جب وہ ابوظہبی، متحدہ عرب امارات (یو اے ای) سے بھارت جا رہی تھی۔ اس دوران آبنائے ہرمز میں ایران پر امریکی اور اسرائیلی فضائی حملے جاری تھے اور تہران خطے میں امریکی فوجی اڈوں کے خلاف جوابی کارروائی کر رہا تھا۔ انادولو ایجنسی نے تھائی میڈیا کے حوالے سے اطلاع دی ہے کہ تھائی وزارت خارجہ نے اس واقعے پر بنکاک میں ایران کے سفیر ناصر الدین حیدری کو طلب کیا اور وضاحت طلب کی۔ دریں اثنا، تھائی وزارت خارجہ نے اس واقعے پر گہری تشویش کا اظہار کرتے ہوئے تمام فریقین سے تحمل کا مظاہرہ کرنے کی اپیل کی ہے۔ وزارت نے کہا کہ مغربی ایشیا میں بڑھتی ہوئی کشیدگی خطے اور دنیا بھر میں شہریوں کی سلامتی کے لیے سنگین خطرہ ہے۔ یہ بحران خطے اور اس سے باہر کے معصوم شہریوں کی زندگیوں اور حفاظت کے لیے سنگین خطرہ ہے۔ حملے کے بعد عمانی بحریہ نے عملے کے 20 ارکان کو بچا لیا۔ تاہم تین تاحال لاپتہ ہیں۔ خیال کیا جاتا ہے کہ حملے کے وقت وہ جہاز کے انجن روم میں کام کر رہے تھے۔ ان کی تلاش کے لیے ریسکیو آپریشن جاری ہے۔