تاثیر 11 اپریل ۲۰۲۶:- ایس -ایم- حسن
کھنڈوا، 10 اپریل : مدھیہ پردیش کے کھنڈوا ضلع میں واقع مشہور تیرتھ مقام اونکاریشور میں جمعہ کو نرمدا ندی میں کشتی پلٹنے سے جھارکھنڈ کے رہنے والے 10 عقیدت مند ڈوب گئے، جنہیں ریسکیو کر کے باہر نکالا گیا۔ ان میں سے دو افراد کی حالت تشویشناک ہے، جنہیں سول اسپتال میں داخل کرایا گیا ہے۔
کھنڈوا کے پولیس سپرنٹنڈنٹ منوج کمار رائے نے بتایا کہ جھارکھنڈ کے رانچی سے تقریباً 52 افراد کا گروپ جمعہ کو اونکاریشور آیا ہوا تھا۔ دوپہر تقریباً 12 بجے الگ الگ کشتی کے ذریعے تمام لوگ نرمدا ندی میں سیر کر رہے تھے۔
اسی دوران ایک کشتی میں سوار 10 افراد برہم پوری گھاٹ سے سنگم گھاٹ کی طرف جا رہے تھے۔ اسی دوران نوین گھاٹ کے پاس کشتی ایک چٹان سے ٹکر گئی۔ ٹکر لگنے سے لکڑی کی کشتی کا تختہ ٹوٹ گیا۔ کشتی کا تختہ ٹوٹنے سے اس میں پانی بھر گیا، جس سے کشتی پلٹ گئی۔ کشتی میں سوار تمام 10 افراد ڈوب گئے۔ موقع پر تعینات ہوم گارڈ جوانوں نے ریسکیو کر کے تمام کو باہر نکالا۔ ان میں آٹھ افراد کی حالت ٹھیک ہے، جبکہ دو افراد زیادہ پانی پی چکے تھے، ان کے پھیپھڑوں میں پانی بھر گیا ہے۔ جنہیں تشویشناک حالت میں اونکاریشور سے سناود بھیجا گیا ہے۔ ابھی حادثے کا شکار ہوئے لوگوں کے نام اور پتے معلوم نہیں ہو سکے ہیں۔ پولیس فی الحال معاملے کی جانچ میں مصروف ہے۔