تاثیر 12 اپریل ۲۰۲۶:- ایس -ایم- حسن
نئی دہلی، 11 اپریل : دہلی حکومت نے ہفتہ کے دن نئی الیکٹرک وہیکل پالیسی کا مسودہ عوام اور متعلقہ فریقین کی رائے کے لیے جاری کر دیا ہے۔ اس مجوزہ پالیسی پر تجاویز دینے کے لیے تمام اسٹیک ہولڈرز کو 30 دن (10 مئی تک) کا وقت دیا گیا ہے، جس کے بعد پالیسی کو حتمی شکل دی جائے گی۔
وزیر اعلیٰ ریکھا گپتا نے ایک بیان میں کہا کہ مجوزہ دہلی الیکٹرک وہیکل پالیسی مسودہ 2026 وزیر اعظم نریندر مودی کی دوراندیش قیادت میں دارالحکومت میں صاف، قابل رسائی اور پائیدار ٹرانسپورٹ نظام قائم کرنے کی سمت ایک اہم قدم ہے۔ یہ پالیسی 31 مارچ 2030 تک مجوزہ ہے۔ اس کے تحت الیکٹرک گاڑیوں کو فروغ دینے کے لیے وسیع مالی مراعات، ٹیکس میں چھوٹ، لازمی دفعات اور بنیادی ڈھانچے کی ترقی پر خاص زور دیا گیا ہے۔
وزیر اعلیٰ نے کہا کہ اس پالیسی کے تحت تمام خریداری مراعات ڈائریکٹ بینیفٹ ٹرانسفر (ڈی بی ٹی) کے ذریعے اہل مستفیدین کو براہ راست دی جائیں گی۔ اس میں وہ افراد، ملکیتی فرمیں، ایجنسیاں اور کمپنیاں شامل ہوں گی جو دہلی کے رہائشی ہیں اور جن کی گاڑیاں دہلی میں رجسٹرڈ ہیں۔ مستفیدین ٹرانسپورٹ ڈپارٹمنٹ کے مقرر کردہ نظام کے ذریعے براہ راست سبسڈی کے لیے درخواست دے سکیں گے۔