تاثیر 5 اپریل ۲۰۲۶:- ایس -ایم- حسن
پٹنہ، 5 اپریل : بہار کے مستقبل کے ساتھ کھلواڑ کرنے والے اور ترقی کی اے بی سی سے ناواقف لیڈروں کا اصل چہرہ عوام کے سامنے بے نقاب ہو گیا ہے۔ یہ بات بھارتیہ جنتا پارٹی کے ریاستی ترجمان اور سابق ایم ایل اے پریم رنجن پٹیل نے کہی۔ انہوں نے کہا کہ تیجسوی یادو کو نہ تو بہار سے لگاؤہے اور نہ ہی اس کی ترقی کی کوئی فکر ہے۔ ان کا واحد مقصد اقتدار پر قبضہ کرنا اور اپنے خاندان کی حفاظت کرنا ہے۔پریم رنجن پٹیل نے کہا کہ تیجسوی یادو کو بھلے ہی سیاست وراثت میں ملی ہو، لیکن انہیں بدعنوانی اور گھوٹالوں کا ورک کلچر بھی وراثت میں ملا ہے جس نے بہار کو دہائیوں پیچھے کر دیا ہے۔ اس عمر میں جب نوجوان اپنے مستقبل کے لیے جدوجہد کر رہے ہیں، تیجسوی یادو نے بے نامی جائیدادوں اور گھوٹالوں کے ریکارڈ جمع کر لیے۔ ان کے لیے سیاست عوامی خدمت کا ذریعہ نہیں بلکہ اپنی تجوریاں بھرنے کا ایک خاندانی کاروبار بن گئی ہے۔انہوں نے کہا کہ تیجسوی یادو کی بہار کی ترقی کی باتیں محض انتخابی نعرہ ہے۔ حقیقت یہ ہے کہ اسے بہار کے زمینی حقائق، اقتصادی پالیسیوں اور ترقیاتی روڈ میپ کی معمولی سی بھی معلومات نہیں ہیں۔ جو شخص ترقی کی بنیادی سمجھ سے بھی محروم ہے وہ ریاست کے روشن مستقبل کے خواب دیکھنے کا ڈرامہ کر رہے ہیں۔ ان کے پاس کوئی پالیسی، کوئی واضح وژن اور کوئی ٹھوس منصوبہ نہیں ہے۔ وہ محض بیان بازی کے ذریعے سیاست کرنے اور انتشار پھیلانے کے عادی ہو چکے ہیں لیکن یہ زیادہ دن نہیں چلے گا۔ریاستی ترجمان پریم رنجن پٹیل نے کہا کہ بہار کے لوگوں نے دیکھا ہے کہ تیجسوی یادو کی ترجیح بہار کے عام لوگ نہیں بلکہ صرف ان کا اپنا خاندان ہے۔ اے سے زیڈ تک ان کا نعرہ ہمیشہ ان کے خاندان کی ترقی رہا ہے۔