مہاراشٹرا میں بے موسم بارش سے ایک لاکھ بائیس ہزار ہیکٹر سے زائد فصلوں کو نقصان

تاثیر 2 اپریل ۲۰۲۶:- ایس -ایم- حسن

پونے ، 02 اپریل : ریاست مہاراشٹرا میں آندھی اور ژالہ باری کے ساتھ ہونے والی بے موسم بارش کے سبب 1 لاکھ 22 ہزار ہیکٹر (3 لاکھ 5 ہزار ایکڑ) سے زائد زرعی اراضی پر کھڑی فصلوں کو شدید نقصان پہنچا ہے۔ ریاستی وزیر زراعت دتاتریہ بھرنے نے بتایا کہ تمام متاثرہ علاقوں کی معلومات متعلقہ افسران سے حاصل کر کے فوری طور پر پنچنامہ مکمل کیا جائے گا اور متاثرہ کسانوں کو جلد از جلد امداد فراہم کی جائے گی۔

زرعی وزیر دتاتریہ بھرنے نے آج بھور تعلقہ کے وڈگاؤں کا دورہ کر کے نقصانات کا براہ راست جائزہ لیا۔ اس موقع پر انہوں نے آم کے باغات سمیت مختلف فصلوں کا معائنہ کیا، جہاں بے موسم بارش کے باعث بڑے پیمانے پر تباہی سامنے آئی۔ کئی مقامات پر پھلوں کا گرنا، درختوں کو نقصان اور کھڑی فصلوں پر منفی اثرات واضح طور پر دیکھے گئے۔ وزیر نے اس دوران کسانوں سے براہ راست بات چیت کر کے ان کے مسائل اور مشکلات کو بھی سنا۔

مارچ کے آخری مرحلے میں ہونے والی اس بے موسم بارش سے ریاست بھر میں بڑے پیمانے پر نقصان ہوا ہے۔ خاص طور پر ناسک (29,812 ہیکٹر)، احمد نگر (23,633 ہیکٹر)، جلگاؤں (22,361 ہیکٹر)، دھولیہ (14,832 ہیکٹر)، بلڈھانہ (8,507 ہیکٹر) اور اورنگ آباد (8,445 ہیکٹر) جیسے اضلاع میں لاکھوں ہیکٹر پر پھیلی فصلیں متاثر ہوئی ہیں۔

ریاست میں کیلا، گیہوں، مکئی، چنا، آم، جوار، تربوز، خربوزہ، سبزیاں، انار، پیاز، سنترہ اور انگور جیسی فصلوں کے ساتھ ساتھ پھلوں کے باغات کو بھی شدید نقصان پہنچا ہے، جس کے باعث کسان شدید معاشی بحران کا شکار ہو گئے ہیں۔ کئی علاقوں میں پیاز سڑ گئی ہے جبکہ پپیتے کے پودے بھی خراب ہو گئے ہیں۔ کھیتوں میں پانی جمع ہونے سے کھڑی فصلیں گر گئی ہیں اور مزدوری و کھاد پر کیا گیا خرچ بھی ضائع ہو گیا ہے۔