تاثیر 25 جون ۲۰۲۶:- ایس -ایم- حسن
فلرٹن (امریکہ)، 25 جون : ورلڈ جونیئر چمپئن شپ کی چاندی کا تمغہ جیتنے والی تنوی شرما اور تھائی لینڈ کی ماسٹرز چیمپئن دیویکا سہاگ نے جمعرات کو متاثر کن کارکردگی کا مظاہرہ کرتے ہوئے 2026 یو ایس اوپن بیڈمنٹن ٹورنامنٹ کے خواتین کے سنگلز زمرے میں فاتحانہ آغاز کیا۔
تنوی شرما نے جرمنی کی یوون لی کو 23-21، 21-16 سے شکست دے کر دوسرے راؤنڈ میں جگہ بنالی۔ دیویکا سہاگ نے پیرو کی انیس لوسیا کاسٹیلو کو سیدھے گیمز میں 21-14، 21-14 سے شکست دی۔
ہندوستانی کھلاڑیوں کے درمیان مردوں کے سنگلز میچ میں ابھرتے ہوئے شٹلر روناک چوہان نے سابق ورلڈ جونیئر چمپئن شپ کے چاندی کا تمغہ جیتنے والے ایس شنکر متھوسامی کو 23-21، 21-16 سے شکست دے کر اگلے راؤنڈ میں جگہ بنائی۔