ایس پی شبھانک مشرا کی صدارت میں جرائم کا جائزہ، زیرِ التوا مقدمات جلد نمٹانے کی ہدایت

حاجی پور / ویشالی (شرافت خان)، : ویشالی کے پولیس سپرنٹنڈنٹ شبھانک مشرا کی صدارت میں جمعہ کے روز تمام انچل پولیس انسپکٹروں کے ساتھ ایک اہم کرائم ریویو میٹنگ منعقد ہوئی۔ اجلاس میں تمام انچلوں کے زیرِ التوا مقدمات کا تفصیلی جائزہ لیا گیا اور ان کے جلد، معیاری اور بروقت تصفیے کے لیے ضروری ہدایات جاری کی گئیں۔ ایس پی شبھانک مشرا نے تمام انچل پولیس انسپکٹروں کو ہدایت دی کہ وہ اپنے اپنے حلقوں کے تھانہ صدور کے ساتھ باقاعدگی سے زیرِ التوا مقدمات کا جائزہ لیں اور تفتیش میں تیزی لا کر مقررہ مدت کے اندر ان کا تصفیہ یقینی بنائیں۔ انہوں نے سنگین اور حساس مقدمات کی ذاتی نگرانی کرنے، مفرور ملزمان کی گرفتاری میں تیزی لانے اور تفتیش کے معیار کو ہر حال میں برقرار رکھنے پر بھی زور دیا۔ ایس پی نے کہا کہ جرائم پر مؤثر قابو، بروقت تفتیش اور معیاری کارروائی پولیس کی اولین ترجیح ہونی چاہیے اور اس سلسلے میں کسی بھی قسم کی غفلت یا لاپروائی برداشت نہیں کی جائے گی۔