رکشابندھن پر ایس ایس بی جوانوں کی کلائیوں پر سجا محبت اور اعتماد کا مقدس دھاگا

ٹھاکرگنج (محمد شاداب غیور) 19ویں واہنی، مسلح سرحدی فورس (ایس ایس بی)، ٹھاکرگنج کے احاطے میں رکشابندھن کا تہوار خوشی، اپنائیت اور حب الوطنی کے جذبے کے ساتھ منایا گیا۔ پروگرام میں تارچند دھانوکا اکیڈمی کے اساتذہ و طالبات کے ساتھ برہما کماری ادارے سے محترمہ شاردہ جی اور ان کی ٹیم نے شرکت کی۔ اس موقع پر طالبات اور برہما کماری ادارے کی ارکان نے ایس ایس بی جوانوں کی کلائیوں پر راکھی باندھ کر بھائی بہن کے مقدس رشتے، محبت، اعتماد اور حفاظت کے عزم کو مزید مضبوط کیا۔ پروگرام سے خطاب کرتے ہوئے 19ویں واہنی کے کمانڈنٹ راج کمار سلکھو نے تمام مہمانوں، طالبات اور برہما کماری ادارے کی ٹیم کا دل کی گہرائیوں سے خیرمقدم کیا۔ انہوں نے کہا کہ رکشابندھن صرف راکھی باندھنے کا تہوار نہیں، بلکہ محبت، اعتماد، احترام، حفاظت اور ذمہ داری کے عزم کا تہوار ہے۔ بہنوں کی جانب سے جوانوں کی کلائی پر باندھی گئی راکھی ملک کی خدمت کے تئیں نئی ذمہ داری کی علامت ہے۔ انہوں نے کہا کہ ایس ایس بی کے جوان مشکل اور نامساعد حالات میں اپنے خاندانوں سے دور رہ کر ملک کی سرحدوں کی حفاظت میں اہم کردار ادا کرتے ہیں۔  کمانڈنٹ نے بتایا کہ ایس ایس بی سرحدی حفاظت کے ساتھ ساتھ سرحدی اور دیہی علاقوں میں فلاحی و سماجی بیداری کے کام بھی انجام دے رہی ہے۔ بیٹی بچاؤ، بیٹی پڑھاؤ، نشہ مکت بھارت اور سوچھ بھارت سمیت مختلف مہمات کے ذریعے عام لوگوں کو بیدار کیا جا رہا ہے۔