سنگھواڑہ میں کباڑ کی دکان میں خوفناک آگ، ڈیڑھ لاکھ روپے کا نقصان

سنگھواڑہ دربھنگہ محمد(  مصطفیٰ) سنگھواڑہ تھانہ حلقہ کے جالے–اتربیل روڈ پر واقع پنیشلہ چوک سے آگے پنجاب نیشنل بینک، منکولی برانچ کے قریب ایک کباڑ کی دکان میں جمعرات کی دیر رات تقریباً 12:30 بجے اچانک آگ بھڑک اٹھی، جس کے نتیجے میں دکان میں رکھا کباڑ جل کر راکھ ہو گیا۔ ابتدائی اندازے کے مطابق دکاندار کو تقریباً ڈیڑھ لاکھ روپے کا نقصان پہنچا ہے۔دکان کے مالک راکیش ساہ نے بتایا کہ انہیں رات تقریباً ساڑھے بارہ بجے آگ لگنے کی اطلاع ملی۔ ان کے مطابق آگ لگنے کی اصل وجہ ابھی تک معلوم نہیں ہو سکی، تاہم انہیں شبہ ہے کہ کسی نامعلوم شخص نے جان بوجھ کر آگ لگائی ہے۔ راکیش ساہ گزشتہ تین برسوں سے بالیشور بھگت کے مکان میں یہ کباڑ کی دکان چلا رہے ہیں۔ واقعے کی اطلاع ملتے ہی مقامی لوگوں نے سنگھواڑہ تھانہ پولیس اور محکمہ فائر بریگیڈ کو اطلاع دی۔ اطلاع پر پولیس فوری طور پر موقع پر پہنچ گئی، جبکہ آگ بجھانے کے لیے فائر بریگیڈ کی ایک بڑی اور ایک چھوٹی گاڑی روانہ کی گئی۔ فائر بریگیڈ کے اہلکاروں نے کافی جدوجہد کے بعد آگ پر قابو پا لیا۔علاقہ کے لوگوں کے مطابق سب سے پہلے دکان سے گھنا دھواں نکلتا ہوا دیکھا گیا، جس کے بعد آگ کا علم ہوا۔ فی الحال آگ لگنے کی حتمی وجہ سامنے نہیں آئی ہے، تاہم مقامی افراد نے شبہ ظاہر کیا ہے کہ اس واقعے میں کسی سماج دشمن عنصر کا ہاتھ ہو سکتا ہے۔دکاندار راکیش ساہ نے واقعے کی غیر جانبدارانہ تحقیقات، آس پاس نصب سی سی ٹی وی کیمروں کی فوٹیج کی جانچ اور قصورواروں کے خلاف سخت قانونی کارروائی کا مطالبہ کیا ہے۔ راکیش ساہ، ناگیندر ساہ کے صاحبزادے ہیں اور ضلع مظفرپور کے کٹرا تھانہ علاقے کے انکھولی گاؤں کے رہائشی ہیں