Taasir Urdu News Network – Syed M Hassan 24th Feb
ممبئی،24فروری: ادھو ٹھاکرے جمعہ (24 فروری) کو دہلی کے وزیر اعلیٰ اروند کجریوال اور پنجاب کے وزیر اعلی بھگونت مان سے ملاقات کریں گے۔ٹھاکرے نے دونوں رہنماؤں کو ممبئی میں اپنے گھر چائے پر مدعو کیا ہے۔ اس میں 2024 کے لوک سبھا انتخابات کے بارے میں تبادلہ ہو سکتا ہے۔ میٹنگ میں تمام اپوزیشن جماعتوں کو ساتھ لانے کے طریقہ کار پر غور کیا جائے گا۔ ذرائع نے بتایا کہ کانگریس کو ساتھ لے کر اتحاد کو کس طرح مضبوط کیا جا سکتا ہے اس پر بھی اس میٹنگ میں تبادلہ خیال ہونے کی امید ہے۔سی ایم اروند کجریوال کی عام آدمی پارٹی (آپ) کو قومی پارٹی کا درجہ ملنے کے بعد کئی ریاستوں پر نظر رکھی جا رہی ہے۔ وہیں مسٹر کجریوال کرناٹک، چھتیس گڑھ، راجستھان اور مدھیہ پردیش سمیت کئی ریاستوں کے دورے پر جائیں گے۔کجریوال 4 مارچ کو کرناٹک، 5 مارچ کو چھتیس گڑھ، 13 مارچ کو راجستھان اور 14 مارچ کو مدھیہ پردیش کا دورہ کریں گے۔ خیال رہے کہ اس سال ان ریاستوں میں اسمبلی انتخابات ہونے ہیں۔ 2024 کے لوک سبھا انتخابات کے پیش نظر اسے بہت اہم سمجھا جا رہا ہے۔ ویسے چھتیس گڑھ اور راجستھان میں کانگریس اقتدار میں ہے اور کرناٹک اور مدھیہ پردیش میں بی جے پی کی حکومت ہے۔سال 2024 میں ہونے والے لوک سبھا انتخابات کو لے کر اپوزیشن لیڈر اتحاد کی کوشش کر رہے ہیں۔ حال ہی میںکجریوال سمیت کئی لیڈران تلنگانہ کے سی ایم کے سی آر کی بلائی گئی ریلی میں گئے تھے۔ اس سے پہلے بہار کے سی ایم نتیش کمار نے بھی اپوزیشن لیڈروں سے ملاقات کی تھی۔