Taasir Urdu News Network – Syed M Hassan 5th March
نئی دہلی،05مارچ: بھارتی ٹیم کے سابق آل راؤنڈر سریش رینا نے لیجنڈز لیگ کرکٹ میں شرکت کی تصدیق کر دی ہے۔ایل ایل سی 2023، 10 مارچ کو دوحہ میں شروع ہوگا۔ بھارت کے لیے 78 ،T20 انٹرنیشنل میچوں میں 1605 رن بنانے والے رینا نے کہا کہ ملک کی نمائندگی کرنا ہمیشہ اعزاز کی بات ہے۔
رینا نے ایل ایل سی کی پریس ریلیز میں کہا، ‘‘میں لیجنڈز لیگ کرکٹ ماسٹرز میں شرکت پر توجہ مرکوز کر رہا ہوں۔ فارمیٹ ایسا ہے کہ آپ کو دوبارہ ہندوستان کی نمائندگی کرنے کا موقع ملے گا۔ اپنے ملک کی نمائندگی کرنا ہمیشہ اعزاز کی بات ہے۔ ہم اس بار ٹرافی گھر لانے کی کوشش کریں گے۔ میں تمام لیجنڈز کے ساتھ کھیلنے پر توجہ مرکوز کر رہا ہوں۔
بتادیں کہ لیجنڈز لیگ کرکٹ میں تین ٹیمیں انڈیا مہاراجہ، ایشیا لائنز اور ورلڈ جائنٹس حصہ لیں گی۔ ٹورنامنٹ کے میچ ایشین ٹاؤن کرکٹ اسٹیڈیم دوحہ میں کھیلے جائیں گے۔ ہندوستانی مہاراجہ کی قیادت گوتم گمبھیر کریں گے۔ ایشیا لائنز کی قیادت شاہد آفریدی کریں گے اور ورلڈ جائنٹس کی قیادت ایرون فنچ کریں گے۔
لیجنڈز لیگ کرکٹ کے سی ای او اور شریک بانی رمن ر ہیجا نے کہا، “ہم نے اس سیزن کے لیے 20 نئے سینئر کھلاڑیوں کو شامل کیا ہے۔ ہمارا پول بڑھ کر 50 کھلاڑیوں کا ہو گیا ہے۔ ہم رینااور ہربھجن سنگھ کو لیجنڈز لیگ کرکٹ میں خوش آمدید کہتے ہیں۔ ہم ہندوستانی مہاراجاوں کے لیے ان لیجنڈز کی جانب سے کچھ شاندار پرفارمنس دیکھنے کے منتظر ہیں۔ بتا دیںکہ انڈیا مہاراجہ اپنا پہلا میچ ایشیا لائنز کے خلاف 10 مارچ کو کھیلے گا۔