Taasir Urdu News Network – Syed M Hassan 02 MARCH
نئی دہلی، 02 اپریل:انڈین پریمیئر لیگ (آئی پی ایل) 2023 میں دفاعی چمپئن گجرات ٹائٹنز کو بڑا جھٹکا لگا ہے۔ نیوزی لینڈ کے تجربہ کار بلے باز کین ولیمسن انجری کے باعث آئی پی ایل کے رواں سیزن سے باہر ہو گئے ہیں۔ گجرات ٹائٹنز نے اتوار کو اپنا باضابطہ اعلان کیا۔گجرات ٹائٹنز نے ٹویٹ کیا کہ ہمیں یہ اعلان کرتے ہوئے افسوس ہو رہا ہے کہ کین ولیمسن چنئی سپر کنگز کے خلاف سیزن کے افتتاحی میچ میں انجری کا شکار ہونے کے بعد ٹاٹا آئی پی ایل 2023 سے باہر ہو گئے ہیں۔ ہم اپنے ٹائٹن کی جلد صحت یابی کی خواہش کرتے ہیں اور اس کی جلد واپسی کے منتظر ہیں۔
نیوزی لینڈ کرکٹ بورڈ نے ٹویٹ کیا کہ گھٹنے کی انجری کے ساتھ گجرات ٹائٹنز سے ان کی آفیشل ریلیز کے بعد، کین ولیمسن انجری کا مزید جائزہ لینے کے لیے نیوزی لینڈ واپس آئیں گے۔ اب وہ اگلے ہفتے نیوزی لینڈ واپس آنے والے ہیں اور علاج کے لیے متعلقہ طبی ماہرین کے پاس جائیں گے۔ولیمسن 31 مارچ کو احمد آباد کے نریندر مودی اسٹیڈیم میں کھیلے گئے پہلے میچ میں چنئی سپر کنگز کے خلاف باؤنڈری پر کیچ لینے کی کوشش میں گھٹنے کی انجری کا شکار ہو گئے تھے جس کی وجہ سے وہ اس سیزن سے باہر ہو گئے ہیں۔ گجرات ٹائٹنز نے اس سال منی نیلامی میں ولیمسن کو 2 کروڑ روپے میں خریداتھا۔
