ساودی کانگریس میں شامل ہوں گے، کئی اور آنے والے ہیں:ڈیکے شیوکمار

Taasir Urdu News Network – Syed M Hassan 14 APRIL

بنگلورو،14اپریل:کرناٹک کانگریس کے صدر ڈی کے شیوکمار نے جمعہ کو کہا کہ سینئر بی جے پی لیڈر اور سابق نائب وزیر اعلیٰ لکشمن ساودی کانگریس میں شامل ہو رہے ہیں۔ لکشمن ساودی کے ساتھ بند کمرے کی میٹنگ کے بعد نامہ نگاروں سے خطاب کرتے ہوئے شیوکمار نے کہا کہ آنے والے دنوں میں کئی اور لیڈر کانگریس پارٹی میں شامل ہوں گے۔ڈی کے شیوکمار نے کہا ’’ہماری گفتگو خوشگوار رہی۔ ان کی (لکشمن ساودی) مقبولیت اور قد کا احترام کیا جائے گا۔ وہ کانگریس خاندان میں شامل ہونے پر راضی ہو گئے۔ وہ شام 4 بجے اپنا استعفیٰ صدر کو پیش کریں گے اور بعد میں باضابطہ طور پر پارٹی میں شامل ہو جائیں گے۔انہوں نے کہا کہ تمام قومی اور ریاستی قائدین ان کا پرتپاک استقبال کرتے ہیں۔ وہ ہمارے خیالات سے متفق ہے۔ ان کا احترام کرنا ہمارا فرض ہے اور ہم انہیں خوش آمدید کہیں گے۔ کانگریس پارٹی میں شامل ہونے کے لیے اور بھی کئی رہنما تیار ہیں۔لکشمن ساودی کو بی جے پی نے بیلگاوی کے اتھانی حلقہ سے ٹکٹ دینے سے انکار کر دیا ہے۔ ان کی جگہ ‘آپریشن لوٹس’ کے ذریعے بی جے پی میں شامل ہونے والے مہیش کمتلی کو ٹکٹ دیا گیا ہے۔ ساودی نے دعویٰ کیا کہ پارٹی نے ان کے ساتھ ناانصافی کی ہے اور یہ بھی کہا کہ نئی دہلی کے کسی رہنما نے ان سے رابطہ نہیں کیا۔