TAASIR NEWS NETWORK- SYED M HASSAN –12 MAY
بریلی، 11 مئی: یوپی کے بریلی شہر سے 20 کلومیٹر دور جیڈ گاؤں کے قریب فوم فیکٹری کے گودام میں خوفناک آگ لگ گئی، جس میں چار مزدور زندہ جل گئے۔ آگ اتنی شدید تھی کہ شعلے دس کلومیٹر دور فرید پور قصبے تک نظر آئے۔ یہ گودام اشوکا پی یو فوم انڈیا پرائیویٹ لمیٹڈ کا ہے۔ اس حادثے میں کمپنی کے تین ملازمین شدید طور پر جھلس گئے، جنہیں اسپتال میں داخل کرایا گیا ہے۔ ان کے علاوہ دو مزدور لاپتہ بتائے جاتے ہیں۔ ریسکیو آپریشن جاری۔پولیس سپرنٹنڈنٹ (دیہی) راج کمار اگروال نے بتایا کہ یہ واقعہ فرید پور تھانہ علاقہ میں پیش آیا۔ فائر بریگیڈ کی کئی گاڑیوں کو موقع پر پہنچایا گیا اور انہیں آگ پر قابو پانے میں تین گھنٹے سے زیادہ کا وقت لگا۔ انہوں نے کہا کہ دو افراد تاحال لاپتہ ہیں اور ان کی تلاش کی کوششیں جاری ہیں۔ فرید پور اسٹیشن انچارج دیاشنکر نے بتایا کہ آگ کی اطلاع ملتے ہی کئی فائر ٹینڈر موقع پر پہنچے اور آگ پر قابو پالیا گیا۔
