TAASIR NEWS NETWORK- SYED M HASSAN –17 MAY
لکھنؤ، 17 مئی: لکھنؤ کے سپر جائنٹس کے اسپنر روی بشنوئی نے اپنے انڈین پریمیئر لیگ (آئی پی ایل) کیرئیر میں اپنی 50 وکٹیں مکمل کر لیں۔ نوجوان اسپنر نے منگل کو لکھنؤ میں ممبئی انڈینز (ایم آئی) کے خلاف کھیلے گئے میچ کے دوران یہ کارنامہ انجام دیا۔ میچ میں، بشنوئی نے 6.50 کی اکانومی کے ساتھ چار اوورز میں 26 رن دے کر 2 وکٹ لیے۔ انہوں نے اوپنر ایشان کشن اور ممبئی کے کپتان روہت شرما کی وکٹیں لیں۔
اپنے آئی پی ایل کیریئر میں، روی بشنوئی کے پاس اب 50 میچوں میں 27.45 کی اوسط اور 7.63 کی اکانومی ریٹ سے 51 وکٹیں ہیں۔ ان کی بہترین باؤلنگ کارکردگی 24 رنز کے عوض 3 ہے۔
موجودہ آئی پی ایل سیزن کی بات کریں تو انہوں نے 13 میچوں میں 24.14 کی اوسط اور 7.95 کی اکانومی ریٹ سے 14 وکٹیں حاصل کی ہیں۔
قابل ذکر ہے کہ منگل کو کھیلے گئے آئی پی ایل 2023 کے 63 ویں میچ میں لکھنؤ سپر جائنٹس نے ممبئی انڈینز کو 5 رن سے شکست دی تھی۔ میچ میں پہلے بلے بازی کرتے ہوئے لکھنؤ نے 3 وکٹ پر 177 رنز بنائے۔ جواب میں ممبئی کی ٹیم 5 وکٹوں پر 172 رن ہی بنا سکی۔
