TAASIR NEWS NETWORK- SYED M HASSAN -01 SEPT
ممبئی، یکم ستمبر :پرو کبڈی لیگ (پی کے ایل) کے منتظم مشال اسپورٹس نے پی کے ایل سیزن 10 کے کھلاڑیوں کی نیلامی کو بعد کی تاریخ تک ملتوی کرنے کا اعلان کیا ہے۔ یہ فیصلہ بھارت میں کبڈی کے لیے سرکاری طور پر تسلیم شدہ ادارہ، امیچیور کبڈی فیڈریشن آف انڈیا (اے کے ایف آئی ) کے منتظمین کی درخواست پر کیا گیا ہے۔ کھلاڑیوں کی نیلامی پہلے 8-9 ستمبر 2023 کو ہونی تھی۔
مشال اسپورٹس کے ترجمان نے کہا، ’’ہمیں اے کے ایف آئی کے منتظم کی جانب سے ایشین گیمز میں کبڈی ایونٹ کے لیے ہندوستانی مردوں اور خواتین کی ٹیموں کی جاری تیاریوں کے پیش نظر پی کے ایل سیزن 10 کے کھلاڑیوں کی نیلامی ملتوی کرنے کی باضابطہ درخواست موصول ہوئی ہے۔ مشال اور اے کے ایف آئی کا خیال ہے کہ یہ ہندوستانی کبڈی کے لیے بہت اہم ایونٹ ہے‘‘۔
پی کے ایل سیزن 10 کے کھلاڑیوں کی نیلامی ملتوی کرنے پر مشاورت کے ایک حصے کے طور پر، مشال نے اے کے ایف آئی کے منتظم کو اس منصوبہ بندی اور تیاریوں کے بارے میں بتایا جو پی کے ایل ٹیموں، پی کے ایل براڈکاسٹ پارٹنرز اور مشال نے 8 سے 9 ستمبر کی پہلے سے طے شدہ تاریخوں کے لیے کی تھی۔
مشال اسپورٹس کے ترجمان کا کہنا ہے کہ’’ایڈمنسٹریٹر نے پی کے ایل کے تمام اسٹیک ہولڈرز بشمول ہماری 12 ٹیموں اور براڈکاسٹرز کے لیے ملتوی کھلاڑیوں کی نیلامی میں کی جانے والی جامع تبدیلیوں کو تسلیم کیا اوراسے سراہا ہے ‘‘۔
مشال اسپورٹس اب پی کے ایل کی ٹیموں اور پی کے ایل کے براڈکاسٹ پارٹنر اسٹار اسپورٹس کی مشاورت سے پی کے ایل سیزن 10 کے کھلاڑیوں کی نیلامی کے لیے اگلی تاریخوں کا اعلان کرے گا۔