TAASIR NEWS NETWORK- SYED M HASSAN -07 SEPT
شیو پوری، 7 ستمبر: مدھیہ پردیش میں تیز رفتار کا قہر تھمنے کا نام نہیں لے رہا ہے۔ تازہ معاملہ شیو پوری ضلع کا ہے۔ یہاں جمعرات کی علی الصبح بیتول سے ستسنگ سن کر گوالیار واپس آ رہے عقیدت مندوں سے بھرا ایک منی ٹرک بے قابو ہو کر الٹ گیا۔ اس حادثے میں تین افراد کی موت ہو گئی، جب کہ کئی لوگ زخمی ہو گئے۔ یہ حادثہ کوتوالی تھانہ علاقہ میں پرمجیت ہوٹل کے قریب فور لین ہائی وے پر پیش آیا۔
معلومات کے مطابق گوالیار، بھنڈ اور آس پاس کے علاقوں میں رہنے والے عقیدت مند 5 ستمبر کو بیتول میں منعقد بابا رامپال کے ستسنگ میں شرکت کے لیے منی ٹرک میں بیتول گئے تھے۔ ستسنگ میں شرکت کے بعد تمام عقیدت مند بدھ کی دوپہر آئسر منی ٹرک میں سوار ہوکر بیتول سے گوالیار کی طرف روانہ ہوئے۔ دریں اثنا، جمعرات کی صبح تقریباً 3.30 بجے، عقیدت مندوں کی گاڑی سنگھ نواس گاو?ں سے گزر رہی تھی، جب ایک ٹرک نے منی ٹرک کو اوور ٹیک کیا۔ جس کے باعث منی ٹرک بے قابو ہو کر الٹ گیا۔
حادثے کی اطلاع ملتے ہی پولیس موقع پر پہنچ گئی۔ بتایا جا رہا ہے کہ پارٹیشن کرکے منی ٹرک میں عقیدت مندوں کو ٹھوس ٹھوس کر بھرا گیا تھا، جن میں خواتین اور مرد، بوڑھے اور بچے شامل ہیں۔ اس میں 35 لوگ سوار تھے۔ حادثے میں تین افراد ہلاک ہو گئے ہیں۔ مہلوکین کے ناموں میں گنگا سنگھ نرواریہ (65) ساکن وکسی پور ضلع بھنڈ، بھنور سنگھ (65) ساکن ڈونگر پورہ ضلع بھنڈ اور رام سنگھ کشواہا (70) ساکن گاو?ں ونبار تھانہ چنور ضلع گوالیار شامل ہیں۔ کئی لوگ زخمی ہوئے ہیں۔ تمام زخمیوں کا علاج ضلع اسپتال سمیت میڈیکل کالج میں جاری ہے۔ پولیس نے معاملے کی تفتیش شروع کر دی ہے۔