تاثیر،۲۴ نومبر۲۰۲۳:- ایس -ایم- حسن
ممبئی، 24 نومبر:جعلی دستاویزات کے ذریعے ملازمت کی تلاش میں برطانیہ جانے والے آٹھ افراد کو امیگریشن حکام نے ممبئی کے ہوائی اڈے پر گرفتار کر لیا۔ امیگریشن حکام نے تمام آٹھ افراد کو مزید تفتیش کے لیے تھانہ سہار کے حوالے کر دیا ہے۔ اس معاملے میں پولیس برطانیہ کے رہائشی ابراہیم قریشی کی تلاش کر رہی ہے جس نے 25 لاکھ روپے فی کس لے کر ہر ایک کے جعلی دستاویزات بنائے تھے۔
ایئرپورٹ پر تعینات امیگریشن افسر گنیش مادھو گاولی کے مطابق بدھ کو آٹھ افراد کو مشکوک حالت میں دیکھا گیا۔ جب ان کے کاغذات کی جانچ پڑتال کی گئی تو ان کے پاس سے جعلی کنٹینیوئس ڈسچارج سرٹیفکیٹ (سی ڈی سی)، جعلی ای مائیگرنٹ لیٹر، جعلی شپ جوائننگ لیٹر، بورڈنگ پاس اور پاسپورٹ سمیت مختلف جعلی دستاویزات ضبط کی گئیں۔ جس کے بعد آٹھوں کے خلاف مقدمہ درج کر کے اسے مزید تفتیش کے لیے تھانہ سہار کی ٹیم کے حوالے کر دیا گیا ہے۔ ان ملزمان کی شناخت دلوار سنگھ، سبھم سوم نیپال سنگھ، مندیپ سنگھ، کیشدیپ سنگھ، سشیل پال، جسوندر پال، کشلپریت سنگھ اور کلجیت سنگھ کے طور پر کی گئی ہے۔ گاولی نے کہا کہ ان سب نے تحقیقات کے دوران بتایا کہ ابراہیم قریشی نے ان سب کو یقین دہانی کرائی تھی کہ وہ یوکے ڈاک تک پہنچنے کے بعد مرچنٹ نیوی میں ملازمت کے خطوط فراہم کریں گے۔ تحقیقات سے یہ بھی پتہ چلا ہے کہ قریشی نے کئی ہندوستانیوں کو برطانیہ میں آباد ہونے میں مدد کے نام پر بہت سے لوگوں سے دھوکہ دہی کی ہے۔ کیس کی گہرائی سے تفتیش جاری ہے۔