تاثیر،۲۶ نومبر۲۰۲۳:- ایس -ایم- حسن
بارہمولہ، 26 نومبر:شمالی کشمیر کے سرحدی علاقے اڑی میں سیکورٹی فورسز نے لشکر طیبہ سے وابستہ تین او جی ڈبلیو کو گرفتار کیا۔ پولیس کے ایک اہلکار نے بتایا کہ مشترکہ فورسز کی ٹیموں نے کلگئی کے مقام پر مشترکہ ناکہ چیکنگ اور گشت کے دوران جھولا فٹ پل کے قریب کمل کوٹ سے قومی شاہراہ کی طرف بیگ اٹھائے ہوئے دو مشتبہ افراد کو روکا جن کی شناخت ضمیر احمد کھانڈے اور محمد نسیم کھانڈے ساکنہ مدیاں کمال کوٹ کے بطور ہوئی ہے۔ افسر نے بتایا کہ تلاشی کے دوران ان سے 3 چینی دستی بم، 2.5 لاکھ نقدی برآمد ہوئی۔ افسر نے مزید بتایا کہ اس سلسلے میں ایک کیس درج کر کے مزید تفتیش شروع کر دی گئی ہے۔ انہوں نے مزید کہا کہ مسلسل پوچھ گچھ کے دوران دونوں ملزمان نے انکشاف کیا کہ یہ غیر قانونی طور پر حاصل کیے گئے دستی بم اور نقدی انہیں منظور احمد بھٹی ولد کرم دین بھٹی سکنہ مدیاں کمال کوٹ نے فراہم کی ہے تاکہ وہ دہشت گردی کی کسی بھی واردات کو انجام دے سکیں۔ اس کے مطابق منظور احمد بھٹی کو پوچھ گچھ کے لیے اٹھایا گیا، اس نے پوچھ گچھ کے دوران انکشاف کیا کہ اس نے یہ غیر قانونی طور پر حاصل کیے گئے دستی بم اور نقدی ان افراد کو دہشت گردی کی کارروائیوں کے لیے فراہم کی ہے۔ اس دوران اس کے انکشاف پر 1 چینی دستی بم اور 2.17 لاکھ نقدی برآمد ہوئی۔ اسے فوری کیس میں گرفتار بھی کیا گیا۔ افسر نے مزید بتایا کہ مزید تفتیش جاری ہے