تاثیر،۳۰ نومبر۲۰۲۳:- ایس -ایم- حسن
نئی دہلی،30؍نومبر:ملک کے معروف صنعتکار اڈانی گروپ کے چیئرمین گوتم اڈانی کی دولت میں بدھ کو اچانک چھلانگ لگ گئی اور وہ ایک بار پھر دنیا کے 20 امیر ترین لوگوں کی فہرست میں شامل ہو گئے ہیں۔ اڈانی گروپ کے شیئرز میں زبردست اضافے کے بعد گوتم اڈانی کی مجموعی مالیت میں 6.5 بلین ڈالر کا اضافہ ہوا ہے۔ گوتم اڈانی کی خالص مالیت میں اضافے کی وجہ پچھلے کچھ دنوں میں ان کی کمپنیوں کے شیئرز میں اضافہ ہے۔بلومبرگ بلینیئرز انڈیکس کے مطابق گوتم اڈانی کی مجموعی مالیت 66.7 بلین ڈالر تک پہنچ گئی ہے۔ اس کی وجہ سے گوتم اڈانی اب 19ویں نمبر پر آ گئے ہیں۔28 نومبر کو، اڈانی گروپ کے حصص کی مجموعی مارکیٹ کیپ 1.04 لاکھ کروڑ روپے بڑھ کر 11.29 لاکھ کروڑ روپے تک پہنچ گئی ہے۔ جو 11 اپریل 2022 کے بعد ایک دن میں سب سے بڑی چھلانگ تھی۔ہندن برگ رپورٹ میں کئے گئے انکشافات پر دائر درخواست پر سپریم کورٹ نے کہا تھا کہ ہندنبرگ رپورٹ کو سچا بیان نہیں مانا جا سکتا۔ سپریم کورٹ نے کہا تھا کہ ہنڈن برگ رپورٹ کی صداقت کی تصدیق کرنے کا کوئی ذریعہ نہیں ہے، اس لیے عدالت نے SEBI سے معاملے کی جانچ کرنے کو کہا ہے۔ سپریم کورٹ کے اس تبصرہ کی وجہ سے اڈانی گروپ کے شیئرز میں اضافہ ہوا۔سی جے آئی ڈی وائی چندرچوڑ نے سپریم کورٹ میں سماعت کے دوران کہا تھا کہ ہمیں ہندنبرگ رپورٹ کے الزامات کو سچ ماننے کی ضرورت نہیں ہے، کیونکہ وہ ہمارے سامنے نہیں ہیں۔ ہم نے اس کی تحقیقات SEBI کو سونپ دی تھی۔بلومبرگ بلینیئرز انڈیکس کی فہرست میں ریلائنس انڈسٹریز کے چیئرمین مکیش امبانی کے بعد گوتم اڈانی دوسرے سب سے امیر ترین ہندوستانی ہیں۔ ٹیسلا کے سی ای او ایلون مسک 228 بلین ڈالر کی دولت کے ساتھ دنیا کے امیر ترین آدمی ہیں۔ اس کے بعد ایمیزون کے جیف بیزوس 171 بلین ڈالر کے ساتھ دوسرے نمبر پر ہیں اور LVMH کے سی ای او برنارڈ ارنالٹ 167 بلین ڈالر کے ساتھ تیسرے نمبر پر ہیں۔